महासंघको चुनाव पछि शेयरबजार झन् बढ्यो

१४ मंसिर, काठमाडौं । नेपाल स्टक एक्सचेन्ज (नेप्से) परिसुचक दिन–दिनै रेकर्ड ब्रेक गर्दै उकालो लागेको छ । हिजो सकिएको नेपाल उद्योग वाणिज्य महासंघको निर्वाचनमा एशोसियटको कार्यकारिणी सदस्यमा नेपाल इन्भेष्टर्स फोरमका पूर्व अध्यक्ष एवं लगानीकर्ता अम्बिकाप्रसाद पौडेल सबैभन्दा बढी मत ल्याएर विजयी भएसँगै बढिरहेको बजारमा थप उत्साह देखिएको हाे ।

आज बजार खुलेदेखि नै सकारात्मक लयमा बढेको थियो । ११ बजे १९१२.५५ बिन्दुबाट अगाडि बढेको नेप्से पाँच मिनेट भित्र नै १९१८ को लाइनमा पुगेको थियो । हल्का घटेजस्तो देखिए पनि नेप्सेले लयकायम राख्दै आधा घण्टा नबित्दै १९३७ को बिन्दु पार गरेको छ ।

एकाथरि लगानीकर्ता बैंकबाट पाउने शेयर कर्जाको व्याजदर कम हुनुको प्रभाव बजारमा परेको जनाइरहेका छन् । आजबाट बजारमा महासंघको चुनावमा पौडेलको विजयले सकारात्मक प्रभाव पर्न सक्ने आंकलन सुर भएको छ । पौडेल ८०२ मत ल्याएर विजयी भएका छन् ।