सत्तालिप्सामा डुबुल्की मार्दै नेकपा

सम्पादकीय

“समृद्ध नेपाल सुखी नेपाली” भन्ने केपी ओली नेतृत्वको सरकारले दिएको नारा अहिले फगत गफाडीकाे गफ सावित भएको छ । लामो समयपछि नेपाली जनताले स्थिर र बलियो सरकार बनाउन ओलीलाई मत दिएका थिए । करिब तीन वर्षअघि जनताले राजनीतिक स्थिरतामार्फत देशको समृद्धि र विकास गर्न ओलीलाई लगाम थमाएका थिए । तर ओलीले जनमतको सम्मान गरेनन् । बरु झण्डै दुई तिहाईको जनमतको उनले अपमान गरे । नेकपाभित्र सत्ता संघर्षको जालो यति जेलियो कि त्यसले आमजनतामा निराशा र आक्रोश थप्यो ।

झण्डै एक वर्षदेखि संसारकै ध्यान कोरोना संक्रमणमा केन्द्रित भएको छ । यसको दूरगामी प्रभाव नेपालीले समेत भोगिरहेका छन् । धेरैको रोजीरोटी नै गुमेको अवस्था छ । तर सत्ताधारी दलका नेताहरु भने दिनहुँ सत्ताको छिनाझपटमा अल्झिएका छन् । सत्तामा भागबण्डा र पदका लागि नेकपाका नेताहरु कम्मर कसेर युद्धमैदानमा भिडिरहेका छन् । यसले उनीहरुको विकृत रुप जनता सामु छर्लङ्ग भएको छ ।

ओली पूर्णतः बिचौलिया र माफियाको चंगुलका फसेको देखिन्छ । उनले सत्ताको चास्नी आफूनिकटलाई मात्र चखाएकाले अर्का अध्यक्ष पुुष्पकमल दाहाल ‘प्रचण्ड’ र नेता माधवकुमार नेपालहरु भड्किएका छन् । सत्तामा आफ्नोपनि भागबण्डा हुनुपर्ने उनीहरुको माग दाबी रहेको छ । तर ओली अहिलेको जनमत आफूलाई मात्र प्राप्त भएको ठान्छन् । समस्याको जड नै त्यही भएको छ ।

यसको पछिल्लो श्रृंखला सचिवालय बैठकमा देखाइएको नौटंकी रहेको छ । ओली र प्रचण्डले बेग्लाबेग्लै आरोपपत्र पेश गरेर जग हँसाएका छन् । जनताप्रतिको उत्तरदायित्व चटक्कै बिर्सिएका नेकपा नेताहरु केवल भागबण्डाकै लडाईंमा छन् । जनता भने रमिते बन्नुपरेको छ । कम्युनिष्ट नेताहरुले आफ्ना कुण्ठा, दम्भ र अहंलाई दस्ताबेजमार्फत उजागर गरेका छन् ।

आम जनताले हिजो मतदान गर्दा ठूलो भूल भएको अनुभूति गरेका छन् । देश विकासका लागि राजनीतिक स्थिरता मात्र कारण नबन्ने तथ्यसमेत अहिले उजारगर भएको छ । भ्रष्ट सोच र अवधारणा नै देश विकासको मुख्य वाधक भएको पक्षसमेत प्रष्टिएको छ । ट्रान्सपरेन्सी इन्टरनेशनलले हालै सार्वजनिक गरेको प्रतिवेदनमा नेपालमा भ्रष्टाचार बढेको देखाएको छ । साथै, यसको कारणका रुपमा प्रधानमन्त्री ओली नै रहेको पक्षसमेत औंल्याइएको छ । भ्रष्टाचारको संरक्षक नै ओली भएको किटानी प्रतिवेदन सार्वजनिक भएको छ ।

आरोप प्रत्यारोपको श्रृँखला जारी छ । कसले कसलाई लडाउने भन्ने मात्र नेकपा नेताहरुको ध्याउन्न रहेको छ । जनताका लागि उनीहरुको घर झगडा अर्थहिन छ । तर तिनै जनताको नाममा उनीहरुको राजनीति टिकेको छ । एकले अर्कालाई होच्याउने गरी होडबाजी नै चलाएका छन् । उनीहरुको दम्भ, अहंकार र तुषको शिकार चाहिं आम नागरिक हुनुपरेको छ । जनताको दुख पीडाप्रति न त सरकारले चासो राखेको छ न प्रतिपक्ष नै आवाज उठाउँछ ।

कम्युनिष्टहरु जुधेपछि विभाजन निश्चित छ । विश्व कम्युनिष्ट इतिहासले स्थापना गरेको मान्यता हो यो । नेकपा अहिले त्यही चरणबाट गुज्रिरहेको अवस्था हो । बैठकमा बाझाबाझ गर्नु भनेको अब एकैथलोमा बस्न नसक्ने आधार तयार भएको मान्नुपर्छ । त्यो आधार लगभग बनिसकेको छ । केवल औपचारिकता दिन मात्र बाँकी हो । यो गाँड कोराकोरले देश भने बर्बादीतिर जान बाध्य भएको छ । इतिहासमै यति सबल र सक्षम सरकार फेरि बन्ला नबन्ला थाहा छैन । तर अहिलेको सरकार भने सबैभन्दा निकम्मा र जनतामारा बनेको छ ।

आम जनताले हिजो मतदान गर्दा ठूलो भूल भएको अनुभूति गरेका छन् । देश विकासका लागि राजनीतिक स्थिरता मात्र कारण नबन्ने तथ्यसमेत अहिले उजारगर भएको छ । भ्रष्ट सोच र अवधारणा नै देश विकासको मुख्य वाधक भएको पक्षसमेत प्रष्टिएको छ । ट्रान्सपरेन्सी इन्टरनेशनलले हालै सार्वजनिक गरेको प्रतिवेदनमा नेपालमा भ्रष्टाचार बढेको देखाएको छ । साथै, यसको कारणका रुपमा प्रधानमन्त्री ओली नै रहेको पक्षसमेत औंल्याइएको छ । भ्रष्टाचारको संरक्षक नै ओली भएको किटानी प्रतिवेदन सार्वजनिक भएको छ ।

यति मात्र होइन, प्रचण्डले पेश गरेको प्रतिवेदनमा समेत सरकारी संयन्त्रमा झांग्गिएको अनियमितता र भ्रष्टाचारको प्रसंग उल्लेख भएको छ । ओली सत्तामा आएपछि भएका चर्चित काण्डहरु नेपाली मिडियाको हटकेक बनेका थिए । तर यसबारे संवैधानिक निकायसमेत रमिते बनिदिंदा सर्वत्र आक्रोश र वितृष्णा छाएको छ ।

सत्ताका आडमा जस्ता सुकै अनियमितता र भ्रष्टाचार राफसाफ गर्न सकिने मूल्य मान्यता ओली सरकारले स्थापित गरिदिएको छ । जसले गर्दा नेपाली जनतामा “जुन जोगी आएपनि कानै चिरिएको”  भन्ने नेपाली उखान फेरि चरितार्थ भएको छ । ओली सरकारको अकर्मण्यता र नेकपा भित्रको सत्ता संघर्षले जनतामा निराशा थपेको छ । त्यसको परिणाम आउने निर्वाचनमा अवश्यपनि उजागर हुनेछ ।