कम्रेड अभिवादन ! बैठक धुम्बाराही हैन्, बालुवाटारमै !

१६ मंसिर, काठमाडौं । नेकपाका केन्द्रीय प्रवक्ता नारायणकाजी श्रेष्ठ सचिवालय बैठक बस्ने थलोका रुपमा तय भएको पार्टी केन्द्रीय कार्यालय धुम्बाराही जान निस्किएका मात्रै थिए– मोबाइलमा घण्टी बज्यो । कल गर्ने थिए– अर्थमन्त्रीसमेत रहेका पार्टी महासचिब विष्णु पौडेल । फोन उठाउने वित्तिकै आवाज आयो–कम्रेड अभिवादन ! सचिवालय बैठक धुम्बाराही हैन , बालुवाटारमै हुने भो , त्यतै आउनुहोला ।

त्यसपछि श्रेष्ठले कार्यकारी अध्यक्ष पुष्पकमल दाहाल ‘प्रचण्ड’लाई कल गरे । प्रचण्डले पनि यस्तै सूचना पाएको जानकारी दिए । उनले दिएको जानकारी अनुसार, पार्टी कार्यालयमा प्रधानमन्त्री केपी ओलीलाई सुरक्षा थ्रेट छ ।  गृह मन्त्रालयले यस्तो सूचना पाएको कुरा प्रधानमन्त्रीलाई रिपोर्टिङ गरेको रहेछ, त्यसैले बैठक बालुवाटारमै गरौं ।

आफूलाई जनताको नेता भन्ने कम्युनिष्ट पार्टीका प्रधानमन्त्रीले सुरक्षा थ्रेट छ भन्दै पार्टी कार्यालय नजाने अवस्थाको कल्पना गर्न पनि सकिन्न । तर यस्तै भएको छ । आफूलाई जननेता भनाउन रुचाउने कम्युनिष्ट नेता अब चारैतिरबाट सेना र प्रहरीको घेराबन्दीमा बस्ने अवस्था आएको छ । पार्टी कार्यालय नै जान नसक्ने अवस्थाका ओलीले देशको नेतृत्व कसरी गरिरहेका होलान्, त्यसै अनुमान गर्न सकिन्छ ।

ओलीले अन्तिम अवस्थामा आएर यस्तो निर्णय लिएका छन् । किनभने उनी बालुवाटारबाट बाहिर जानासाथ अरुले कब्जा पो गर्ला कि भन्ने त्रस्त मनस्थितिमा देखिएका छन् ।  साथै, लगत्तै बस्ने स्थायी कमिटी र केन्द्रीय कमिटी बैठक छल्नका लागिसमेत ओलीले यस्तो रणनीति बनाएको हुनसक्ने सम्भावना औंल्याइएको छ ।