पूर्वएमाले देखाएर नेकपा फुटाउने गल्ती नगर्न ओलीलाई माधव नेपालको चेतावनी

१६ मंसिर, काठमाडौं । सत्तारुढ नेकपाका वरिष्ठ नेता माधवकुृमार नेपालले पूर्व एमालेलाई देखाएर पार्टी फुटाउने दुस्साहस नगर्न प्रधानमन्त्री केपी शर्मा ओलीलाई चेतावनी दिएका छन् । मंगलबारको सचिवालय बैठकमा नेता नेपालले पुर्व एमालेको साथ पाउँछु भनेर पार्टी फ्ुटाउने दुस्साहस नगर्न ओलीलाई चेतावनी दिएका हुन् ।

प्रचण्ड र ओलीबीच सचिवालय बैठकमा जुहारी चलेको थियो । जुहारी हेरेपछि आक्रोशित बनेका माधव नेपालले ओलीलाई कडा शब्दमा चेतावनी दिएका हुन् । उनले ओलीकै कारण पार्टी ध्वस्त हुन लागेको बताए । अब पार्टी एकता कसैले तोड्न नसक्ने, तोड्न नदिइने नेपालले बताए ।

पछिल्लो समय प्रचण्डसँगको जुहारीका क्रममा प्रधानमन्त्री ओलीले पूर्वएमाले खेमाका नेताहरुलाई आलोचना नगर्ने र आफूतिर नजिक ल्याउने रणनीति अपनाउँदै आएका छन् । यही सिलसिलामा मंसिर १३ को बैठकमा प्रस्तुत ३८ पृष्ठ लामो प्रस्तावमा पनि प्रधानमन्त्री ओलीले प्रचण्डलाई मात्रै गाली गरेका छन् ।

प्रतिवेदनमा ओलीले माधव नेपाल, झलनाथ खनालहरुलाई फकाउने प्रयास गरेका छन् । यस अतिरिक्त ओली गुटका सबै नेताहरु माधव नेपाल पक्षलाई फकाउनतर्फ लागिरहेका छन् ।

यसरी ओली पक्षले सचिवालयदेखि स्थानीय कमिटीसम्म पूर्वएमालेको बहुमत रहेको बताइरहेकै बेला मंगलबारको बैठकमा वरिष्ठ नेता नेपालले अब पूर्वएमालेहरु एकातिर हुन्छन् भनेर नसोच्न ओलीलाई चेतावनी दिएका हुन् ।