होटलमा युवतीसँग रंगेहात भेटिएका डीएसपी निलम्बनमा

१७ मंसिर, कैलाली । होटलमा युवतीसँग रंगेहात भेटिएका नेपाल प्रहरीका डीएसपी निलम्बनमा परेका छन् । इलाका प्रहरी कार्यालय मालाखेती कैलालीमा कार्यरत प्रहरी नायव उपरीक्षक डीएसपी भरतराज चौधरीलाई गृह मन्त्रालयले निलम्बन गरेको हो ।

मंसिर ९ गते मध्यराति सम्पर्कविहीन भएका डीएसपी चौधरी भोलि बिहान होटलमा भेटिएका थिए । खोजी गर्दा होटलमा युवतीसँग रंगेहात भेटिएका उनीमाथि छानबिन चलिरहेको प्रहरीले जनाएको छ ।

सुदूरपश्चिम प्रदेश प्रहरी कार्यालयले प्रहरी उपरीक्षक एसपी दिलीपसिंह देउवाको नेतृत्वमा उनीमाथि छानविन गरिरहेको जनाएको छ । पहिलो चरणमा जिम्मेवारी खोसेर छानबिन भइरहेकोमा जिल्ला प्रहरी कार्यालय कैलालीले उनलाई निलम्बन गर्न सिफारिस गरेको थियो ।