ओली नगएपछि सचिवालय बैठक स्थगित

१७ मंसिर, काठमाडौं । प्रधानमन्त्री केपी शर्मा ओली नगएपछि नेकपाको सचिवालय बैठक स्थगित भएको पाइएको छ । एक घण्टा ढिलो गरी बालुवाटारमा शुरु भएको सचिवालय बैठक २० मीनेटमै सकिएको थियो ।

बैठक शुरु भएको २० मीनेटसम्म पनि प्रधानमन्त्री ओली उपस्थित नभएपछि स्थगित गरिएको नेकपा सचिवालयका सदस्यले जानकारी दिएका छन् । प्रधानमन्त्री ओलीका प्रेस सल्लाहकार सुर्य थापाले सार्वजनिक गरेको सचिवालय बैठकका तस्बिरमा पनि ओलीको कुर्सी खाली छ ।

ओली बैठकमा नगएका कारण स्थगित भएको देखिएको हो । मंसिर २० गते दिउँसो १ बजे फेरि सचिवालय बैठक बोलाइएको छ ।

आफुनो गुटका नेताहरुसँग छलफल गरेपछि ओली बैठकमा जाने भनिएको थियो । तर अन्तिम समयमा ओली बैठकमा नगएपछि नेकपाभित्रको विवाद झन उत्कर्षमा पुगेको छ ।

यसअघि हिजो पनि प्रचण्डसँग भनाभन भएपछि ओलीले आजको बैठकमा नजाने बताएका थिए ।