कांग्रेस वरिष्ठ नेता रामचन्द्र पौडेल पक्राउ

१७ मंसिर, काठमाडौ । नेपाली कांग्रेसका वरिष्ठ नेता रामचन्द्र पौडेललाई प्रहरीले पक्राउ गरेको छ । तनहुँमा पुल उद्घाटन गएका पौडेललाई प्रहरीले पक्राउ गरेको हो ।

तनहुँका प्रमुख जिल्ला अधिकारी सागर आचार्यको आदेशमा वरिष्ठ नेता पौडेल र तनहुँका कार्यवाहक सभापति जित प्रकाश आलेलाई पक्राउ गरिएको हो ।

वरिष्ठ नेता पौडेल व्यास नगरपालिकाले निर्माण गरेको मोटरेबल पूलको उदघाटन गर्न गएका थिए । तर जिल्लाका नेकपा नेताहरुको निर्देशनमा प्रशासनले कडाई गरेको थियो ।

पौडेल पुल उद्घाटन गर्न पुगेपछि सदरमुकाम दमौलीमा नेकपाका नेता कार्यकर्ताले प्रदर्शन गरेर भीडभाड शुरु गरेका थिए । प्रदर्शनले गर्दा अशान्ति भएको भन्दै प्रशासनले निषेधाज्ञा समेत जारी गरेको थियो ।

नेकपाले कांग्रेसका वरिष्ठ नेता पौडेललाई पुल उद्घाटन गर्न नदिने भन्दै प्रदर्शन गरेको थियो । त्यही प्रर्दशनको आडमा प्रमुख जिल्ला अधिकारी सागर आचार्यले सुरक्षा प्रवन्ध मिलाउनुको साटो पूर्वाधार विकास कार्यालय तनहुँलाई दबाब दिएर पुल उद्घाटन स्थगन गरिदिन अनुरोध भएको पत्र लेख्न लगाएका पाइएको छ ।

पूर्व निर्धारित भएकाले पुल उद्घाटन गरिने कांग्रेसले जनाएपनि प्रशासनले गर्न दिएन् । प्रहरीले पक्राउ गरेर हिराशतमा लिएपछि कांग्रेस वरिष्ठ नेता पौडेलले आपत्ति जनाएका छन् । सामाजिक सञ्जाल फेसबुकमा उनले आफूलाई पक्राउ गरेर हिराशतमा राखिएको र प्रहरीको आडमा गुण्डागर्दी गरिएको बताएका छन् ।

कांग्रेस नेता पौडेलको कार्यक्रम रोक्न नेकपाका नेता किसान श्रेष्ठले गुण्डा पठाएका थिए । श्रेष्ठले गुण्डा परिचालन गरेरै वरिष्ठ नेता पौडेलविरुद्ध नाराबाजी गरेर पक्राउ गर्न लगाएको पनि तनहुँका कांग्रेस नेताहरुको भनाई छ ।

पक्राउ परेपछि कांग्रेस वरिष्ठ नेता पौडेलले पञ्चायतको मण्डलेतन्त्र फेरि फर्केर आएको टिप्पणी गरेका छन् । आफूमाथि ज्यादती गर्ने र जनतालाई भ्रम छर्ने काम सरकारबाट भएको टिप्पणी गरेका छन् ।

‘हिजो हामीलाई रुख रोप्न लाग्दा पनि हामीलाई पिट्ने मान्छे आज तीनै हुन । आज पुल उद्घाटन गर्दा कुन शान्ति भंग हुन्छ, कुन विकास रोकिन्छ, कुन जनतलाई पीडा हुन्छ ? कुन देशलाई नोक्सान हुन्छ ? हामी पुलको उद्घाटन गर्छौैँ । यो सबै झुटा हो, तँ रोएजस्तो गर, म कुटेजस्तो गर्छु भनेजस्तो हो’ नेता पौडेलले भनेका छन् ।

पक्राउ परेका पौडेलको रिहाईको माग गर्दै फेसबुक र ट्वीटरमा चर्को आलोचना भएको छ ।