पौडेलको गिरफ्तारीप्रति नेपाली जनसम्पर्क समिति अमेरिकाद्धारा गम्भीर खेद प्रकट

१७ मंसिर, काठमाडौं ।  प्रमुख प्रतिपक्षी दल नेपाली कांग्रेसका वरिष्ठ नेता रामचन्द्र पौडेलको गिरफ्तारीप्रति नेपाली जनसम्पर्क समिति अमेरिकाले घोर निन्दा गरेको छ ।आफ्नो गृह जिल्ला तनहुमा स्थानीय जनताको माग र उपभोक्ता समितिको निमन्त्रणामा आज व्यास नगरपालिका वडा नं १० बुल्दी खोलाको मोटरवल पुल उदघाटनको क्रममा सरकारले नेता पौडेलमाथि गरेको अवरोध, धरपकड र गिरफ्तारीप्रति समिति अमेरिकाले घोर निन्दा र भर्त्सना गरेको हाे ।

समितिका महासचिव मुनिन्द्र नेम्बाङद्धारा जारी विज्ञप्तिमा भनिएको छ, नेकपा सरकारकले राज्य सत्ताको चरम दुरूपयोग गर्दै, नेपाली जनता माथि लाठि चार्ज गर्ने बल प्रयोग गरी कार्यक्रमलाई बिथोल्ने र फरक बिचार बोकेका नेता, कार्यकर्तामाथि निर्मम दमन र दुर्ब्यवहार गर्ने सरकारको यस्ता सर्वसत्तावादी चिन्तन र व्यवहार घोर निन्दनीय असैय भएको ठहर गर्दै, नेपाली जनसम्पर्क समिति अमेरिका यस घटनाप्रति गम्भीर खेद प्रकट गर्दछ ।

त्यसैले तत्काल सरकारले गरेका यस्ता कुकृत्य प्रति माफी माग्दै, नेकाका वरिष्ठ नेता लगायत हिरासतमा भएका सबै नेताहरूलाई ससम्मान रिहाइ गर्न समिति सरकार समक्ष जोडदार माग गर्दछ जारी विज्ञप्तिमा उल्लेख गरिएको छ ।

विज्ञप्तिमा अगाडि भनिएको छ, घाइतेहरूको शिघ्र स्वास्थ्य लाभको कामना गर्दै, लोकतन्त्र र कनुनी राज्यको धज्जी उडाउने नेकपा सरकारको यस्ता रवैया, अधिनायकवादी सोच र घटनाको बिरूद्धमा सम्पूर्ण देश विदेशमा छरीएर रहेका लोकतन्त्रवादी नेपाली जनताहरू आन्दोलित हुन र लोकतन्त्र र कानुनी राज्यको रक्षार्थ एकजुट हुन समितिले सबैमा बिनम्र आग्रह गरेको छ ।