भेरीमा उपचाररत एक संक्रमितको मृत्यु

१८ मंसिर, राँझा ।  नेपालगञ्जस्थित भेरी अस्पतालमा उपचाररत एक कोरोना संक्रमितको आज बिहान मृत्यु भएको छ । कोहलपुर नगरपालिका–२ बाँके निवासी ७४ वर्षिय वृद्धको उपचारकै क्रममा आज बिहान मृत्यु भएको भेरी अस्पतालका मेडिकल सुपरिटेण्डेण्ट डा.प्रकाश थापाले जानकारी दिए ।

उनका अनुसार यही मंसिर ६ गते अस्पताल भर्ना भएका ती पुरुषमा कोरोना संक्रमण देखिएको थियो । रोगको प्रकृतिअनुसार सबै उपचार विधि अपनाउँदासमेत स्वास्थ्यमा सुधार नभई मृत्यु भएको हो । योसँगै कोरोना संक्रमणका कारण बाँकेमा ज्यान गुमाउनेको सङ्ख्या ३९ पुगेको छ ।