प्रदेश २ का मुख्यमन्त्रीको फेसबुक पेज ह्याक, कभर र प्रोफाइल फोटो परिवर्तन

१९ मंसिर, जनकपुर । प्रदेश २ का मुख्यमन्त्री लालबाबु राउतको व्यक्तिगत र मुख्यमन्त्री सञ्चार सचिवालयको फेसबुक पेज ह्याक गरेर युवतीको फोटो राखिएको छ । राखिएकी युवतीको फेस चिनियाँ जस्तो देखिन्छ ।

मुख्यमन्त्री राउतको नाममा रहेको ‘सिएम लाल बाबु राउत’ नामक फेसबुक र उनको कार्यालय अन्तर्गत रहको ‘मुख्यमन्त्री सञ्चार सचिवालय’ पेज शुक्रबार विहान एकसाथ ह्याक गरिएको हो ।

यी दुबै पेज ह्याक गरी कभर र प्रोफाइल फोटो परिवर्तन गरिएको छ । प्रोफाइल फोटोमा युवतीको फोटो राखिएको छ । मुख्यमन्त्री सञ्चार सचिवालयको फेसबुकमा चाइनिज भाषाको प्रयोग गर्दै युवतीको फोटो राखिएको छ ।

मुख्यमन्त्री सचिवालयका कर्मचारी आतेश मिश्रले बिहान ९ बजेतिर दुबै पेज एकाएक ह्याक भएको बताए । उनले प्रहरीको साइबर क्राइम हेर्ने निकायलाई यसबारे जानकारी गराइसकिएको बताए ।