ओलीका दूतको बढ्दो सक्रियता, खुमलटार हुँदै ईश्वर पुगे शीतल निवास

१९ मंसिर, काठमाडौं । भोलिको सचिवालय बैठकले कडै निर्णय लिने छनक पाएपछि प्रधानमन्त्रीसमेत रहेका नेकपा अध्यक्ष केपी ओलीको सक्रियता बढेको छ । आफूविरुद्ध अप्रिय निर्णय नहोस् भनेर ओलीले हिजैबाट आफ्ना दूतहरुलाई अग्रसर गराएका छन् । ओलीले सबैभन्दा पहिला अर्का अध्यक्ष पुष्पकमल दाहाल ‘प्रचण्ड’लाई रोक्ने प्रयास थालेका छन् ।

यसका लागि उनले प्रचण्डले समेत पत्याएका नेताहरु परिचालन गरेका छन् । हिजै महासचिव विष्णु पौडेल र संसदीय दलका उपनेता सुभाषचन्द्र नेम्बाङलाई खुमलटार पठाए । तर प्रचण्डले कुनै लचकता नदेखाएपछि शीतल निवास प्रयोग गरे । ओलीको आग्रहमा राष्ट्रपति विद्यादेवी भण्डारीले प्रचण्डलाई बोलाएर छलफल गरिन् ।

तर समस्याको जड ओली नै भएको भन्दै प्रचण्डले ओलीको प्रस्ताव अस्वीकार गरिदिए । त्यसपछि ओलीको छटपटाहट अझै चुलिएको छ । आज सखारै ओलीले उपप्रधानमन्त्री ईश्वर पोखरेललाई खुमलटार पठाए । खुमलटारमा प्रचण्डलाई भेटेपछि ईश्वर अहिले शीतल निवास पुगेका छन् ।