तनहुँ घटनाबारे कांग्रेस सिरियस, के हाेला निर्णय ?

१९ मंसिर, काठमाडौं । नेपाली कांग्रेसका वरिष्ठ नेता रामचन्द्र पौडेलमाथि वर्तमान सरकारले गरेको दुर्व्यवहारका सम्बन्धमा छलफल गर्न पार्टी सभापति शेरबहादुर देउवाले आज दिउँसो पदाधिकारी बैठक बोलाएका छन् ।

पार्टी प्रवक्ता विश्वप्रकाश शर्माले दिएको जानकारी अनुसार, दिउँसो २ बजे देउवा निवास बुढानिलकण्ठमा पदाधिकारी बैठक बस्नेछ । गत बुधबार तनहुँमा निर्मित एउटा पुलको उद्घाटन गर्न गएका नेता पौडेलमाथि ओली सरकारले बर्बर दमन गरेको थियो । उक्त घटनाको सर्बत्र विरोध र निन्दा भएको छ ।

यसबारे सभापति देउवाले प्रधानमन्त्री ओलीसँग कुरा गरेका थिए । तर ओलीले यसबारे गम्भिरतापूर्वक नलिएको देउवा निकट स्रोतले बतायो ।
ओली सरकारको सर्वसत्तावाद विरुद्ध आन्दोनल गर्नुपर्ने अवस्था आएको भन्दै कांग्रेसले विरोध जनाएको छ ।

यसबारे आजको पदाधिकारी बैठकले एउटा ठोस निर्णय लिने विश्वास प्रवक्ता शर्माले दिलाए । आज वरिष्ठ नेता पौडेलसमेत सहभागी हुने बैठकमा उनका कुरा सुनेर थप निर्णय लिन सकिने पनि प्रवक्ता शर्माले बताए ।