सरकार दृष्टि भएर पनि दृष्टिकोण नभएको नेतृत्व : नेता गुरुङ

२३ मंसिर, काठमाडौं । नेपाली कांग्रेसका केन्द्रिय सदस्य धनराज गुरुङले दुई तिहाइको सरकारको नेतृत्व सोचे जस्तो नभएको आरोप लगाएका छन् । सामाजिक सञ्जालमा कान्तिपुरमा प्रकाशित समाचारलाई मेन्सन गर्दै उनले सरकारको कडा आलोचना समेत गरेका हुन् ।

दैलेखमा स्वास्थ्य केन्द्रका भवन निर्माण भएर हस्तान्तरण नगरी भत्काइँदै शिर्षकप्रति सरकारको आलोचना गर्दै नेता गुरुङले भनेका छन्, दृष्टि भएर पनि दृष्टिकोण नभएको नेतृत्व भएपछि हुने नै यस्तै हो।

जिल्लाको ठाँटीकाध गाउँपालिकामा बनेको प्राथमिक स्वास्थ्य केन्द्रको भवन हस्तान्तरण नहुँदै भत्काउन लागिएको छ । करिब डेढ दशकअघि निर्माण सम्पन्न भएका तीनवटा भवन भत्काएर त्यहाँ नयाँ भवन बनाउन थालिएको हो ।

२०५९ सालमा सम्झौता भई ३ वर्षमा निर्माण सम्पन्न भएको भवनमा ८२ लाख रुपैयाँ खर्च भएको थियो । किसान कन्स्ट्रक्सनले एउटा ठूलो र दुईवटा साना भवन बनाएको थियो ।

यता, स्थानीयबासीले भवन हस्तान्तरण नगरेरै भत्काउन थालेपछि अख्तियार दुरुपयोग अनुसन्धान आयोगमा उजुरी दिएका छन् । यसअघि पनि भवन निर्माणमा अनियमितता भएको भन्दै अख्तियारमा उजुरी दिइएको थियो ।

नेता गुरुङले गणतन्त्रलाई कतैबाट खतरा छ भने ओली सरकारको चरम भ्रष्टाचार, सत्ता र शक्तिका लागि राष्ट्रिय स्वाधीनता बिरुद्ध बिदेशी प्रभुको अगाडि लम्पसार पर्ने प्रबृत्ति र अधिनायकवादी चरित्रबाट भएको ठोकुवा गरेका छन् ।