देशलाई पुनःरक्तरञ्जित नबनाऊ, हुन नदेऊ : कांग्रेस नेता केसी

२३ मंसिर, काठमाडौं । नेपाली कांग्रेसका नेता तथा पूर्वमन्त्री अर्जुननरसिह केसीले हिंसा सदैव निन्दनीय हुने बताएका छन् । आज बिहान मोरङको मिक्लाजुङ गाउँपालिकाकामा अज्ञात समूहले एक प्रधानाध्यापकको अपहरण गरेर गोली हानी हत्या गरेको समाचारलाई मिन्सेन गर्दै नेता केसीले हिंसा सदैव निन्दनीय हुन्छ,यसको भविष्य हुदैन शान्तिको विकल्प छैन भनि भनेका छन् ।

सामाजिक सञ्जाल ट्वीटरमा शिक्षक हत्या प्रकरणलाई मिन्सेन गर्दै केसीले लामो हिंसात्मक द्वन्द्व र रक्तपात पूर्ण कहालीलाग्दो स्थितिबाट भर्खर उन्मुक्त यो देशलाई पुनःरक्तरञ्जित नबनाऊ, हुन नदेऊ भन्दै शान्तिपूर्ण लोकतान्त्रिक मार्ग,वार्ता र सहमतिबाटै समाधान खोज्नु जरुरी रहेको बताएका छन् ।

मिक्लाजुङ गाप १ स्थित सरस्वती आधारभूत विद्यालयका प्रधानाध्यापक ५४ वर्षीय राजेन्द्र श्रेष्ठलाई मंगलबार बिहान ६ बजेतिर नेत्रविक्रम चन्द नेतृत्वको ‘विप्लव समूहले घरबाटै अपहरण गरेर गोली हानी हत्या गरेको हो । अपहरणमा परेका प्रअ श्रेष्ठको शव घरदेखि एक किलोमिटर टाढा रहेको मिक्लाजुङ १ मै पर्ने बर्खेको जंगलमा भेटिएको मोरङ प्रहरीले जनाएको छ ।

घटनास्थल पूर्वपश्चिम राजमार्गदेखि झन्डै ३० किलोमिटर उत्तर विकट पहाडी क्षेत्रमा पर्छ । यो समूहमाथि सरकारले प्रतिबन्ध लगाएको भए पनि देशभर विप्लवका कार्यकर्ताहरूले छिटपुट हिंसात्मक घटना गर्ने प्रयास गरिरहेका छन् । यता मंगलबार साँझ मेची–कोशी ब्युरोका इञ्चार्ज प्रतापको नामबाट विज्ञप्ति जारी गर्दै समूहले घटनाको जिम्मेवारी लिएको हो ।