१७ कम्पनीको झण्डै १३ अर्बको शेयर पाइपलाइनमा

२४ मंसिर, काठमाडौं । बैंक, जलविद्युत, बीमा कम्पनी र अन्य क्षेत्रसहितको करिब १२ अर्ब ७७ करोड ६४ लाख ३७ हजार ७ सय २० रुपैयाँ बराबरको १२ करोड ७६ लाख ८२ हजार आठ सय ३६ कित्ता शेयर (आईपीओ) बजारमा आउने तयारी भइरहेको छ ।

शेयर जारी गर्ने तयारीमा रहेका कम्पनीहरु शेयर जारी गर्नका लागि नेपाल धितोपत्र बार्डको अनुमतिको पर्खाइमा रहेका छन् । बोर्डका अनुसार न्यादी हाइड्रोपावर, शुभम् पावर, तेह्रथुम पावर कम्पनी, हिमालयन हाइड्रो, विन्ध्यावासिनी हाइड्रोपावर, मैलुङखोला जलविद्युत, ग्रिनलाइफ हाइड्रोपावर, सिङ्गटी हाइड्रोपावर, मध्ये भोटेकोशी जलविद्युत र रुरु जलविद्युत परियोजनाले शेयर जारीका लागि चाहिने अनुमतिका लागि बोर्डमा निवेदन दिएका छन् । ति कम्पनीहरुको शेयर निष्काशनका लागि चाहिने आवश्यक प्रक्रियाहरु पुरा गरेपछि मात्रै बोर्डले शेयर निष्काशन अनुमति दिने जनाएको छ ।

त्यसैगरी बीमा तर्फ भने ज्योति लाइफ इन्स्योरेन्सले यही मंसिर १९ गते बोर्डमा अनुमति माग्दै निवेदन दिएको छ । इन्स्योरेन्सले १०० रुपैयाँ अंकित ६६ लाख कित्ता शेयर निष्काशनको लागि अनुमति मागेको छ ।

बैंकिङ तर्फ भने नेपाल इन्फ्रास्ट्रक्चर बैंक लिमिटेडले यही मंसिर ८ गते १०० रुपैयाँ अंकित ८० करोड कित्ता शेयर निष्काशनको लागि निवेद पेश गरेको छ । बैंकको सो शेयर निष्काशन अनुमति पाएपश्चात एनआईबीएल एस क्यापिटलले बिक्रि गर्ने छ । अनुमति पाएको खण्डमा यस बैंकको शेयर नै नेपालमा अहिलेसम्म एकै पटक उच्च संख्यामा आइपीओ निष्काशन गर्ने कम्पनीको रुपमा रेकर्ड रहने छ ।

त्यस्तै इमर्जिङ नेपाल, सीइडीबी हाइड्रोपावर डेभलपमेन्ट कम्पनी, डिस मिडिया नेटवर्क, महिला लघुवित्त, सीआईबीएल क्यापीटल पनि शेयर निष्काशनको अनुमतिका लागि बोर्डको पाइपलाइनमा नै रहेका छन् ।