शिक्षक ‘हत्या अनुसन्धान’ तिव्र पार्न सुरक्षा प्रमुखहरुलाई गृहमन्त्रीकाे निर्देशन

२४ मंसिर, काठमाडौं । गृहमन्त्री रामबहादुर थापाले मोरङको मिक्लाजुङ गाउँपालिका–१ मा हत्या गरिएका शिक्षक राजेन्द्र श्रेष्ठको ‘हत्या अनुसन्धान’ तिव्र पार्न सुरक्षा प्रमुखहरुलाई निर्देशन दिएका छन् ।

बुधवार गृह मन्त्रालयमा आयोजित केन्द्रीय सुरक्षा समितिको बैठकमा सुरक्षा प्रमुखहरुलाई ब्रिफिङमा उनले शिक्षकको हत्यामा संलग्नको खोजी तिव्र बनाउन र पक्राउ गरेर कारवाही गर्न निर्देशन दिएका हुन् ।

मंगलबार मिक्लाजुङस्थित सरस्वती आधारभूत विद्यालयका प्रअ राजेन्द्र श्रेष्ठलाई सुराक गरेको आरोपमा विप्लवका कार्यकर्ताले हत्या गरेका थिए । हत्याको जिम्मा विप्लव समूहले लिएको छ ।

बैठकमा प्रहरी महानिरीक्षक शैलेश थापा क्षेत्री, सशस्त्र प्रहरी प्रमुख शैलैन्द्र थापा, राष्ट्रिय अनुसन्धान विभागका प्रमुख गणेश अधिकारी लगायत सहभागी थिए । सुरक्षा निकायका प्रमुखसँग नियमित ब्रिफिङ भएको गृह मन्त्रालयका प्रवक्ता ‘सह–सचिव’ चक्रवहादुर बुढाले रातोपाटीलाई बताए । गृहमन्त्रीलाई सुरक्षा प्रमुखहरुले पछिल्लो सुरक्षा अवस्थाको रिपोर्ट गरेका थिए ।