सरकारविरुद्ध कांग्रेस सडक आन्दोलनमा, काे नेता कहाँ जाँदै ?

२६ मंसिर, काठमाडौं । प्रमुख प्रतिपक्षी दल नेपाली कांग्रेसले आगामी सोमबार वर्तमान सरकारविरुद्ध देशव्यापी आन्दोलन गर्ने भएको छ । यस प्रयोजनका लागि पार्टीले केन्द्रीय नेताहरुलाई जिल्ला जिल्ला खटाएको छ ।  पार्टी सभापति शेरबहादुर देउवा सोमबार सरकारविरोधी आन्दोलनको नेतृत्व गर्न बाग्मती प्रदेश राजधानी हेटौंडा जाँदैछन् । यस्तै वरिष्ठ नेता रामचन्द्र पौडेलले संघीय राजधानी काठमाडौंको नेतृत्व गर्ने भएका छन् ।

गएको मंसिर १७ गते वरिष्ठ नेता पौडेलमाथि तनहुँको दमौलीमा आयोजित एक कार्यक्रममा सरकारी भिजिलान्तेहरुले दुर्व्यहार गरेका थिए । एउटा पुल उद्घाटजन गर्न गएका नेता पौडेलमाथि प्रहरीले बल प्रयोग गरेको थियो ।  सोही कार्यक्रमको विरोध स्वरुप कांग्रेसले सोमबार देशव्यापी रुपमा सरकारको विरोधमा प्रर्दशन गर्ने भएको छ ।

अन्य जिल्लाका लागि समेत केन्द्रले नेताहरु खटाएको जानकारी प्रवक्ता विश्वप्रकाश शर्माले दिए । पार्टी उपाध्यक्ष विमलेन्द्र निधिले भक्तपुुरमा आयोजित विरोधसभालाई संवोधन गर्ने छन् । यस्तै महामन्त्री डा. शशांक कोइरालाले विराटनगरको कार्यक्रममा सहभागिता जनाउनेछन् । कोषाध्यक्ष सीतादेवी यादवले ललितपुरको नेतृत्व गर्ने जानकारी प्रवक्ता शर्माले दिए ।

साथै, पूर्व महामन्त्री प्रकाशमान सिंह जनकपुर पुग्नेछन् भने कृष्णप्रसाद सिटौलाले महोत्तरीको विरोधसभालाई नेतृत्व गर्ने भएका छन् ।  उक्त विरोधसभामा कांग्रेसले सरकार विरोधी नारासमेत तय गरेको प्रवक्ता शर्माले बताए । हामीले विभिन्न १० वटा नारा तय गरेका छौं, सोही बमोजिम विरोध हुनेछ– उनले भने ।

कांग्रेसले तय गरेको नारामा सर्वसत्तावादी ओली सरकार – मुर्दाबाद, मुर्दाबाद, तनहुँमा भएको दुर्व्यहार–अपमान र अत्याचार,बढ्यो महिला हिंसा र बलात्कार–अकर्मण्य भो ओली सरकार,चारैतिर भ्रष्टाचार– जनताले चिन्यो ओली सरकार, अति भो अति भो–मुलुककै छवि क्षति भो जस्ता रहेका छन् ।