अब ओलीसँग सम्झौता नगर्ने प्रचण्डको घोषणा

२६ मंसिर, काठमाडौं । पद र पार्टी संकटमा परेका प्रचण्डसँग कानेखुशी गरेर कुर्सी जोगाएका प्रधानमन्त्री केपी शर्मा ओलीलाई अध्यक्ष प्रचण्डले कडा चेतावनी दिएका छन् । सत्तारुढ नेकपाका कार्यकारी अध्यक्ष पुष्पकमल दाहाल प्रचण्डले अब ओलीसँग कानेखुसी गरेर पार्टी नचल्ने भन्दै कडा शब्दमा चेतावनी दिएका हुन् ।

बागमती प्रदेशका आफू निकट जिल्ला इञ्चार्ज, अध्यक्ष र सचिवहरुको भर्चुअल भेलामा प्रचण्डले अध्यक्ष एवं प्रधानमन्त्री केपी शर्मा ओलीमा कानेखुसी गर्न रुचाउने प्रवृत्ति देखिएको बताए । तर अब ओलीसँग एक्लै कानेखुशी गरेर मात्रै कार्यकर्ताको विश्वास थाम्न नसकिने भएकाले त्यसतर्फ आफू सचेत भएको प्रचण्डको भनाई छ ।

प्रचण्डले अब ओलीसँग एक्लाएक्लै बस्ने र कानेखुसी गरेर अगाडि नबढ्ने बताएका छन् । सचिवालयकै नेताहरु कानेखुसीको नीति अवलम्बन गर्ने र धोका दिने प्रवृत्ति ओलीमा रहेको ओलीको भनाई छ ।

पछिल्लो सचिवालय र स्थायी कमिटी बैठकमा प्रचण्डमाथि निर्णायक भूमिका खेल्नुपर्ने दबाब छ । ओलीलाई राजीनामा दिन लगाउने निर्णायक कदममा प्रचण्ड अडिग हुनुपर्ने र ओलीको दम्भ समाप्त गर्नुपर्ने आवश्यकता रहेको कार्यकर्ताको जोड छ । तर प्रचण्डले सबै नेताहरुलाई मिलाएर पार्टी एकता जोगाउने पक्षमा आफू रहेको कार्यकर्तालाई जवाफ दिएका छन् ।