नेकपाको प्रवक्ताबाट राजीनामा दिन नारायणकाजीलाई गोकूलको सुझाव

२८ मंसिर, विराटनगर । नेकपाका नेता तथा पूर्वमन्त्री गोकूल बाँस्कोटाले नेकपाको प्रवक्ताबाट तत्काल राजीनामा दिन नारायणकाजी श्रेष्ठलाई सुझाव दिएका छन् । नेकपाका युवा नेताहरुले आयोजना गरेको भेलालाई सम्बोधन गर्दै बाँस्कोटाले तत्काल राजीनामा नदिए नारायणकाजीमाथि नैतिकता कै प्रश्न उठ्ने चेतावनी दिएका हुन् ।

प्रेस संगठन मोरङले आयोजना गरेको पत्रकार सम्मेलनमा पूर्वमन्त्री बाँस्कोटा पर्शुराम बस्नेतलाई साथमा राखेर प्रस्तुत भएका थिए । ओलीनिकट युवाहरुको प्रदेश भेलालाई सम्बोधन गर्न मोरङ आएका बाँस्कोटाले अल्पमत र बहुमतका आधारमा अघि बढे पार्टी दुर्घटनामा पर्ने बताए । उनले पार्टीमा देखिएको विवाद स्थायी कमिटी बैठकले समाधान गर्ने बताए ।

पूर्वसांसद कमानसिंह लामाको लेनदेन प्रकरणमा नेकपा प्रवक्ता नारायणकाजी श्रेष्ठ विवादमा मुछिएको सम्बन्धमा बाँस्कोटाले आफूबाट सिक्न आग्रह पनि गरे । सुरक्षण मुद्रण खरीद प्रकरणमा ७० करोडको अडियो प्रकरणमा मुछिएपछि मन्त्री पदबाट राजीनामा दिएका बाँस्कोटाले प्रवक्ता श्रेष्ठलाई लक्षित गर्दै भने, ‘आदर्श नेताले मबाट सिक्ने के ! कम्तिमा मेरो जति गरिदिएको भए राम्रो हुन्थ्यो होला ।’