सुदुरपश्चिममा कोरोनाले मृत्यु हुनेको संख्या ६४ पुग्यो

२८ मंसिर, कैलाली । कैलालीको धनगढीमा दुई जना कोरोना संक्रमित महिलाको मृत्यु भएको छ । सेती प्रादेशिक अस्पतालमा धनगढी उपमहानगरपालिका १ की ५५ वर्षीया महिला र गोदावरी नगरपालिका १ की ७५ वर्षीया महिलाको कोरोना कारण मृत्यु भएको हो ।

श्वासप्रश्वासमा समस्या आएपछि धनगढीकी ५५ वर्षीया महिला मंसिर २२ गते अस्पतालमा भर्ना भएकी थिइन् । अस्पतालका अनुसार उनी मधुमेह सम्बन्धी रोगबाट समेत पीडित थिइन् । गोदावरीकी ७५ वर्षीया महिलाको उपचारको क्रममा आइतबार बिहान मृत्यु भएको अस्पतालले जनाएको छ ।

कोरोना संक्रमित उनी मंसिर २१ गते सेती प्रादेशिक अस्पतालमा भर्ना भएकी थिइन् । उनलाई अस्पतालको भेन्टिलेटरमा राखेर उपचार गरिए पनि बचाउन नसकिएको अस्पतालले जनाएको छ । यससँगै सुदूरपश्चिममा कोरोनाबाट मृत्यु हुनेको सङ्ख्या ६४ पुगेको छ।