कांग्रेस अब कहिल्यै कम्युनिस्टसँग सहकार्य गरेर अघि बढ्दैन : महामन्त्री कोइराला

२९ मंसिर, काठमाडौं । नेपाली कांग्रेस महामन्त्री शशांक कोइरालाले देशमा अब राजतन्त्र फर्केर नआउने बताएका छन् । सोमबार विराटनगरस्थित कोइरालानिवासमा आयोजित पत्रकार सम्मेलनमा जनमत संग्रहमार्फत हिन्दु राष्ट्र स्थापना गर्नुपर्नेमा उनले जोड दिए ।

पत्रकार सम्मेलनमा कोइरालाले पार्टीको महाधिवेशन आगामी फागुन ७ मा सम्भव नभएको भन्दै जेठमा गर्नुपर्ने पनि बताए । उनले आउँदो महाधिवेशनमा आफूहरूका तर्फबाट जो भए पनि सभापतिको उम्मेदवार एक जना मात्रै हुने स्पष्ट पारे । आउँदो महाधिवेशनका लागि आफू र शेखर कोइरालामध्ये को सभापतिको उम्मेदवार हुने भन्ने निर्णय पार्टीका नेता, कार्यकर्ता र आपसी छलफलले टुंगो लाग्ने उनको भनाइ थियो ।

तनहुँमा गाउँपालिकाले नै पुल उद्घाटनमा पार्टीका वरिष्ठ नेता रामचन्द्र पौडेललाई बोलाएको अवस्थामा सरकारले गरेको ज्यादतीको विरोधमा देशभरि उत्रिन बाध्य भएको भन्दै उनले यसलाई निरन्तरता दिनुपर्ने बताए । संवैधानिक परिषद्को बैठकमा प्रमुख प्रतिपक्षी दल कांग्रेसको उपस्थिति नहुनु लोकतान्त्रिक मूल्य–मान्यताविपरीत भएको पनि उनको भनाइ थियो ।

कांग्रेस अब कहिल्यै कम्युनिस्टसँग सहकार्य गरेर अघि नबढ्ने पनि कोइरालाले दाबी गरे । २०४६ सालमा कांग्रेसले कम्युनिस्टसँग सहकार्य गरेर मुलुकमा दोस्रो शक्तिका रूपमा स्थापित गराउनु ठूलो भूल भएको उनले बताए ।