नारायणकाजीको विवाद मिलाउन प्रधानमन्त्री ओलीसँग गुहार

२९ मंसिर, काठमाडौं । दिंवगत नेता कमानसिंह लामासँग जोडेर आफ्नो बदनाम गर्न खोजिएको भन्दै नेकपाका प्रवक्ता नारायणकाजी श्रेष्ठकी प्रमुख स्वकीय सचिव सुसन कर्माचार्यले प्रधानमन्त्री केपी शर्मा ओलीसँग गुहार मागेकी छिन् ।

याम्बलिङ हाइड्रोपावर र नेकपाका दिवंगत नेता कमान सिंह लामासँगको विवाद मिलाउन सुसनले कर्माचार्यलाई भेटेकी हुन् । भेटमा प्रधामन्त्री ओलीले हल्लाको पछि नलाग्न सुझाव दिएको बताइएको छ । उनी हाल याम्बलिङ हाइड्रोपावरको अध्यक्षमा पनि छिन् ।

कमानसिंह लामाको निधन भएपछि हाइड्रोपावर र लामा परिवारभित्रको विवाद बाहिरिएको थियो । दुई करोड रुपैयाँको कुरा अडियो भिडियोमै सुनिएपछि नारायणकाजी श्रेष्ठ पनि यो विवादमा परेका छन् ।

आफ्नो श्रीमान र छोरीसहित आइतबार दिउँसो प्रधानमन्त्री निवास बालुवाटार पुगेकी सुसनले प्रधानमन्त्री ओलीसँग सहयोग मागेको बताइएको छ । जवाफमा प्रधानमन्त्री ओलीले हल्लाको पछि नलाग्न र कसैका कुरा नसुन्न आग्रह समेत गरेका छन् ।

साथै मानसिंह लामाले यसबारे आफूसँग पनि कुरा गरेको तर यो आपसी विषय भएकाले मिलेर सल्टाउन र नेकपाका अर्का अध्यक्ष प्रचण्डले केही सहयोग गर्न सक्ने भए त्यता कुरा गर्न सुझाव पनि दिएका छन् ।

यसअघि हिजो नेकपाको स्थायी कमिटी बैठकमै अध्यक्ष प्रचण्डले नारायणकाजीको चरित्र हत्या गर्न खोजिएको भन्दै बचाउ गरेका थिए । अब ओलीले पनि सहयोग गर्ने भएपछि नारायणकाजीको विवाद तत्कालका लागि नेकपाको ठूलो ‘इस्यु’ नहुने देखिएको छ । कार्यकर्ताहरुमा भने पूर्व एमाले पक्षले नारायणकाजीमाथि क्रमशः आक्रमण गरिरहेका छन् ।