जावलाखेलमा नेपाली कांग्रेसको प्रदर्शन, केन्द्रिय कोषाध्यक्ष सीतादेवीको सम्बोधन

२९ मंसिर, काठमाडौं । नेपाली कांग्रेसले आज देशैभर प्रदर्शन गरिरहेको छ । सरकारविरुद्ध सडकमा ओर्लिएको कांग्रेसले विभिन्न ठाउँमा प्रदर्शन गरिरहेको हो । नेपाली कांग्रेसका शीर्ष नेताहरुले विभिन्न ठाउँमा आयोजित विरोध सभालाई सम्बोधन गरिरहेका छन् ।

यस्तै नेपाली कांग्रेसले ललितपुरमा गरेको विरोधसभालाई केन्द्रिय कोषाध्यक्ष सीतादेवी यादवले सम्बोधन गरेकी छिन् । सम्बोधनका क्रममा यादवले वर्तमान सरकार इतिहासकै शक्तिशाली भएपनि निर्बल भएको टिप्पणी गरेकी छिन् ।

दुई तिहाई बहुमतको दम्भ देखाएर सरकारले भ्रष्टाचार गर्ने बाहेक अर्थोक गर्न नसकेको यादवको टिप्पणी छ । जावलाखेलमा हजारौ कांग्रेस कार्यकर्ता सहभागी भेलालाई सम्बोधन गर्दै यादवले अब नेकपा सरकारले जनतालाई निराशा फैलाउने काम मात्रै गरेकाले अब कांग्रेसले जनताका आशा र सपना पूरा गर्ने बताइन् ।

साथै उनले जनताको करबाट आफ्नो जीविकोपार्जन गर्ने कर्मचारी तथा सुरक्षाकर्मीलाई सचेत भएर आफ्नो जिम्मेवारी पूरा गर्न आग्रह पनि गरेकी छिन् ।