ओली राजावादीसँग मिलेको देउवाको आरोप

२९ मंसिर, काठमाडौं । नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओली राजावादीसँग मिलेको आरोप लगाएका छन् । सरकारकै कारण सडकमा ‘राजा आऊ देश बचाऊ’ को नारा लागेको बताउँदै देउवाले ओली राजावादीसँग मिलेको बताएका हुन् ।

सरकारविरुद्ध हेटौंडामा सोमबार आयोजित विरोध सभालाई सम्बोधन गर्दै देउवाले राजावादीहरुको आन्दोलनका लागि ओली सरकार नै जिम्मेवार जिकिरे गरे ।
प्रजातन्त्रको खिलाप जानुहुन्न भन्दा तत्कालिन राजाले आफूलाई थुनेको स्मरण गर्दै उनले राजाले प्रजातन्त्रलाई नसहेका कारण आफूहरु गणतन्त्रको पक्षमा उभिएको देउवाको भनाई थियो ।

देउवाले एकदलीय सर्वसत्तावादी शासन लागू गर्न खोजेको भन्दै सरकारको चर्को आलोचना गरे । सरकार भ्रष्टाचार र बलात्कारका घटनालाई दबाउन र पीडकलाई संरक्षण दिन लागिपरेको देउवाको आरोप छ ।

निर्मला पन्तको बलात्कारपछि हत्या भएको लामो समय हुँदासम्म अपराधी पक्राउ नपरेको भन्दै उनले भने, शून्य सहनशीलता भन्ने मन्छेले अहिलेसम्म हत्यारालाई पक्राउ नगर्नु दुःखद भएको बताए । भाषणका क्रममा उनले सडक अवरोध गरेर सभा गर्नुपरेकामा क्षमा मागेका थिए ।