ओली सरकारका कारण गणतन्त्र धरापमा : नेता केसी

२९ मंसिर, काठमाडौं । नेपाली कांग्रेसका केन्द्रीय सदस्य अर्जुन नरसिंह केसीले नेकपाको सरकारबाट लोकतन्त्र र गणतन्त्र नै धरापमा परेको बताएका छन् । कांग्रेसले सोमबार बागलुङमा गरेको विरोधसभालाई सम्बोधन गर्दै नेता केसीले सरकारले देश र लोकतन्त्रको अस्तित्व वर्वादी गरेको बताएका हुन् ।

हिटलरले पनि आफू निर्वाचित भएर निरंकुशता लादेको इतिहास छ भन्दै नेता केसीले वर्तमान सरकारले पनि निरंकुशता र संविधान विरोधी काम गरेर आफ्नो पतनको बाटो आफैं खनेको आरोप लगाए ।

सेक्युरिटी प्रिन्टिङ प्रेस, वाइडबडी, ओम्नी र यति समूह, बुढीगण्डकी जलविद्युत आयोजना लगायतका दर्जनौं विषयमा भ्रष्टाचारलाई सरकारी संरक्षण भएको केसीको आरोप छ ।

तनहुँमा भएको घटनामा वरिष्ठ नेता रामचन्द्र पौडेलमाथि भएको अभद्र व्यवहारले कांग्रेस जाग्‍ने एउटा निहुँ बनेको भन्दै केसीले यसअघिका दर्जनबढी घटनामा कांग्रेस कार्यकर्तामाथि सरकारी आक्रमण भएको पनि उनको भनाई छ । केसीले फरक विचारलाई शत्रु ठान्ने कम्युनिष्टबाट बहुदलीय व्यवस्था र बहुलबाद नै खतरामा परेको दाबी गरेका छन् ।