संवैधानिक परिषदको बैठक आज बस्दै

३० मंसिर, काठमाडौं । संवैधानिक परिषदको बैठक आज बस्दैछ । प्रधानमन्त्री केपी शर्मा ओलीको अध्यक्षतामा बस्ने बैठकले बिभिन्न संवैधानिक अंगमा नियुक्तिका लागि सिफारिस गर्ने तयारी गरेको छ ।

आजको बैठकमा विपक्षी दलका नेता शेरबहादुर देउवा सहभागी हुनेछन् । आइतबार देउवा र सभामुख अग्नि सापकोटा सहभागि हुन नसक्ने बताएपछि बैठक रोकिएको थियो । अख्तियार दुरुपयोग अनुसन्धान आयोगको प्रमुख आयुक्त सहित अन्य बिभिन्न संवैधानिक निकायमा लामो समयदेखि पदाधिकारी रिक्त छन् । यसअघि पनि पटक पटक विपक्षी दलका नेता सहभागी नभएपछि बैठक बस्न सकेको थिएन।

सरकारले गत वैशाखमा अध्यादेशमार्फत संवैधानिक परिषदको बैठकमा बहुमतले निर्णय लिन सक्ने व्यवस्था गर्न लागेको थियो । तर राजनीतिक दल सम्बन्धी अध्यादेश विवादमा परेपछि उक्त अध्यादेश पनि फिर्ता भएको थियो ।

पछिल्लो समय परिषदमा दलीय भागबण्डा मात्रै हुन थालेको भन्दै आलोचना हुन थालेको छ ।