सभामुखले बहिस्कार गरेपछि संवैधानिक परिषदको बैठक स्थगित

३० मंसिर, काठमाडौं । सत्तारुढ नेकपाको विवाद संवैधानिक परिषदको बैठकमा पनि देखा परेको छ । प्रधानमन्त्री केपी ओलीले सरकारी नियुक्तीहरुमा एकलौटी कायम गरेको भन्दै सचिवालय र स्थायी कमिटीमा विवाद चर्किरहेको बेला त्यसको छायाँ संवैधानिक परिषदको बैठकमा देखिएको हो ।

आज प्रधानमन्त्री ओलीले डाकेको परिषद बैंठकमा सदस्य रहेका सभामुख अग्नि सापकोटाले बहिस्कार गरेपछि संवैधानिक परिषदको बैठक अनिश्चितकालका लागि स्थगित भएको छ । बैठकबारे समन्वय नभएको, पूर्वतयारी नभएको तथा गृहकार्य नपुगेकाले सभामुख सापकोटा बैठकमा नगएको बताइएता पनि नेकपा पार्टीमा चलिरहेको भागबण्डाको लडाई कै कारण उनले बैंठक बहिस्कार गरेका हुन ।

यसअघि आइतबारको बैठक पनि प्रमुख प्रतिपक्षी दल नेपाली कांग्रेसका नेता शेरबहादुर देउवा अनुपस्थित भएपछि स्थगित गरिएको थियो । सभामुख सापकोटा अनुपस्थित भएपछि बालुवाटारमा बिहान डाकिएको बैठक अब कहिले बस्ने भन्ने अनिश्चित भएको छ ।

११ संवैधानिक निकायमा रिक्त रहेका ४६ पदाधिकारी नियुक्तिको एजेन्डामा छलफल गर्न प्रधानमन्त्री केपी शर्मा ओलीले आज बैठक डाकेका थिए । संवैधानिक निकायहरूमा पदाधिकारी नियुक्तिका लागि प्रधानमन्त्री अध्यक्ष रहने संवैधानिक परिषद छ ।

परिषदमा प्रधानन्यायाधीश, प्रतिनिधिसभाको सभामुख, राष्ट्रियसभाको अध्यक्ष, विपक्षी दलको नेता र प्रतिनिधिसभाका उपसभामुख सदस्य रहन्छन् । हाल उपसभामुखको स्थान रिक्त छ ।

अख्तियारको प्रमुख आयुक्त, महालेखापरीक्षकसहित १२ वटा संवैधानिक आयोगका ६२ पदमा संवैधानिक परिषदको निर्णयमा पदाधिकारीहरूको नियुक्ति हुने व्यवस्था छ । अहिले ४६ स्थान रिक्त छन् ।