ओलीको अध्यादेशविरुद्ध खुमलटारमा प्रचण्ड-माधव नेपाल पक्षको गोप्य छलफल

३० मंसिर, काठमाडौं । प्रधानमन्त्री केपी शर्मा ओलीले संवैधानिक परिषद्सम्बन्धी अध्यादेश ल्याएपछि प्रचण्ड माधव नेपाल पक्ष गोप्य छलफलमा जुटेको छ । सरकारको सिफारिसमा राष्ट्रपतिबाट अध्यादेश जारी भए लगत्तै कार्यकारी अध्यक्ष प्रचण्डले अध्यादेश खारेजीको माग गर्दै खुमलटारमा गोप्य छलफल शुरु गरेका हुन् ।

खुमलटारमा पाँच सचिवालय सदस्यसहित प्रचण्ड–माधव नेपाल पक्षका प्रभावशाली नेताहरुको बैठक बसिरहेको छ । ओलीविरुद्धको रणनीतिका रुपमा प्रचण्डले गोप्य छलफल चलाएको बताइएको छ । फेरि एकपटक ओलीले नेताहरुमाझ आफुलाई शक्तिशाली देखाउन अध्यादेश जारी गरेपछि प्रचण्ड लगायतका नेताहरु झन् रुष्ट बनेका छन् ।

प्रचण्डको निजी सचिवालयका अनुसार तत्काल बदनीयतपूर्ण ढंगले ल्याइएको अध्यादेश खारेज गरी संसद अधिवेशन बोलाउनुपर्ने माग गरेका छन् ।स्थायी कमिटी बैठकको एक दिनअघि पार्टीको पहिलो बरीयताका अध्यक्ष समेत रहेका प्रधानमन्त्रीले अध्यादेश ल्याएपछि विभाजन नजिक पुगेको नेकपामा विवाद थपिएको हो ।

प्रचण्ड–माधव नेपाल पक्षले अध्यादेश खारेजीको एजेण्डा बुधवारको बैठकमा लैजाने छ । यस विषयमा खुमलटारको भेलाले थप निष्कर्ष निकालेपछि नेकपाभित्रको विवादले कस्तो रुप लिन्छ ? भन्ने खुल्नेछ ।