ओली सरकार पाँच वर्ष चल्नुपर्नेमा नेकपाकै युवा नेताहरुको जोड

३० मंसिर, काठमाडौं । नेपाल कम्युनिष्ट पार्टी नेकपामा देखिएको मतभेदले सरकारको भविष्यमा कुनै असर नपार्ने नेकपा सम्बद्ध युवा विद्यार्थीले बताएका छन् ।

नेकपासँग आबद्ध युवा सङ्घद्वारा आज यहाँ आयोजित भेलामा उनीहरुले आफूभित्रको समस्यालाई समाधान गरी एकताबद्ध भएर नेकपा अघि बढ्ने विश्वास व्यक्त गरेका हुन् ।

दुई ठूला शक्तिशाली पार्टी जनताका चाहना र कम्युनिष्ट आन्दोलनको निम्ति एक भएकाले यो पार्टी फुट्न नहुने कुरामा उनीहरुले जोड दिएका छन् । सङ्घका केन्द्रीय संयोजक रामप्रसाद सापकोटाले सरकार कुनै पनि हालतमा पाँच वर्ष टिक्ने भन्दै पार्टी फुट्न नदिन युवा एक भएर लाग्नुपर्ने सुझाव दिए । उनले पार्टी एकता कसैको स्वार्थ पूरा गर्न नभई नेपाली जनताको चाहना र आवश्यकता पूरा गर्नका लागि भएको पनि बताए ।

नेकपाका केन्द्रीय सदस्य महेश रेग्मीले पार्टीमा गम्भीर सङ्कट देखा परेकाले यसको समाधानका लागि युवा एकताबद्ध भएर लाग्नुपर्नेमा जोड दिए । पार्टीका अर्का केन्द्रीय सदस्य शिवकुमार मण्डलले पार्टीको सञ्चालन विचार र विधिबाट हुनुपर्ने बताउँदै सरकार जनताका हितमा केन्द्रित रहनुपर्ने उल्लेख गरे ।

सांसद अमनलाल मोदीले विधि र पद्धतिबाट सञ्चालन भएमात्र पार्टी दीर्घजीवी हुने धारणा राखेका थिए । प्रदेश सभा सदस्य कुशल लिम्बूले सरकारले जनतालाई न्याय दिन नसकेको र पार्टीलाई पनि व्यवस्थित गर्न नसकेको विचार व्यक्त गरे ।