कार्यकाल नसकिँदै पुर्वाधार विकास बैंकका सीईओले दिए राजिनामा

३० मंसिर, काठमाडौं । पुर्वाधार विकास बैंकका प्रमुख कार्यकारी अधिकृत अनिल ज्ञवालीले पदबाट राजिनामा दिएका छन् । मन्त्रिपरिषद् बैठकले पुर्वाधार विकास बैंकका प्रमुख कार्यकारी अधिकृतको पदमुक्त गर्ने निर्णय गरेपछि उनले राजिनामा दिएको बताइएको छ । ८ अर्ब रुपैयाँको साधारण शेयर निष्काशन तयारी गरिरहेको बैंकका संस्थापक प्रमुख कार्यकारी अधिकृत ज्ञवाली दुई बर्षको कार्यकाल सकेर बाहिरिएका छन् ।

ठुला पुर्वाधारमा लगानी गर्ने उदेश्यले स्थापित पुर्वाधार विकास बैंकमा ज्ञवाली चार वर्षे कार्यकालका लागि नियुक्त भएका थिए । कार्यकाल २ वर्ष बाँकी रहँदा नै ज्ञवालीलाई सरकारले जिम्मेवारी मुक्त गरेको छ । कामु प्रमुख कार्यकारीको जिम्मेवारी भुपेन्द्र पाण्डेलाई दिइएको छ । पाण्डे राष्ट्रिय वाणिज्य बैंकको नायव प्रमुख कार्यकारी अधिकृतबाट अवकाश लिएर पुर्वाधार विकास बैंकमा आएका थिए । सरकारको दश प्रतिशत शेयरसहित निजी क्षेत्रबाट ९० प्रतिशत लगानी जुटाउने गरी बैंक खोलिएको बैंक हो । २० अर्ब रुपैंया चुक्ता पूँजी रहेको पुर्वाधार विकास बैंकमा सरकारको १० प्रतिशत लगानी छ ।

बैंकिङ क्षेत्रमा करिब ३५ वर्ष लामो समय विताएका अनिल ज्ञवाली नेपाली बैंकिङ क्षेत्रमा परिचित नाम हो । अमेरिकाबाट पढेर नेपाल फर्किएको केही समयमा नै तत्कालिन नेपाल अरब बैंक (अहिलेको नबिल) को संस्थापक कर्मचारीका रुपमा बैंकिङ करियर सुरु गरेका ज्ञवालीले माथिल्लो व्यवस्थापनमै नियुक्त भएर काम सुरु गरेका थिए । उनी बैंकमा आवद्ध हुँदा अरब बैंकले सञ्चालन अनुमतिसमेत पाएको थिएन ।

०७२ जेठमा ग्लोबल आइएमइ बैंकको प्रमुख कार्यकारी अधिकृतमा नियुक्त भएका ज्ञवाली कार्यकाल पूरा हुन दुई बर्ष बाँकी छँदै बाहिरिएका थिए। नबिल बैंकमा चार बर्षे कार्यकाल पूरा गरेलगत्तै उनी ग्लोबल आइएमई गएका थिए । नबिलअघि पनि ज्ञवाली ग्लोबलकै प्रमुख कार्यकारी अधिकृत थिए। उनले त्यस बेला पनि चार बर्षे कार्यकाल सकिनु एक बर्ष बाँकी छँदै छाडेका थिए ।