प्रधानन्यायाधीस र सभामुखलाई महाअभियोग लगाउने रणनीति

३० मंसिर, काठमाडौं । प्रधानमन्त्री केपी शर्मा ओलीले संवैधानिक परिषदसम्बन्धि अध्यादेश ल्याएपछि सत्तारुढ नेकपा र प्रतिपक्षी दल नेपाली कांग्रेस आ आफ्नो रणनीतिमा लागेका छन् । खुमलटारमा बसेको नेकपाका कार्यकारी अध्यक्ष प्रचण्ड र वरिष्ठ नेता माधव कुमार नेपाल पक्षको भेलाले प्रधानमन्त्री ओलीलाई साथ दिने प्रधानन्यायाधीसमाथि महाअभियोग लगाउने रणनीति बनाएको छ ।

विवादास्पद अध्यादेश ल्याएर पनि न्यायपालिकाको प्रमुख भएर कार्यपालिकाको आदेशापलक भएको भन्दै प्रचण्ड र माधव नेपाल पक्षले प्रधानन्यायाधीस चोलेन्द्र समशेर जबरामाथि महाअभियो लगाउने रणनीति बुनेको हो ।

ओलीलाई साथ दिने प्रधानन्यायाधीसमाथि महाअभियोग लगाएर तर्साउने योजना प्रचण्ड पक्षको छ । जसलाई प्रतिपक्षी दल नेपाली कांग्रेसले पनि साथ दिने योजना छ । यता ओली पक्ष भने आफूलाई साथ नदिने सभामुख अग्नि सापकोटाविरुद्ध महाअभियोग प्रस्ताव दर्ता गर्ने योजना बनाएको छ ।

संंसद अधिवेशन बोलाउन दबाब दिने र संसदमै प्रधानन्यायाधीस र सभामुखमाथि महाअभियोग लगाउने दुई पक्षको तयारी छ । ओली अब देश चलाउनेभन्दा तानाशाही शासन लाद्न उद्दत रहेको प्रचण्ड, माधव नेपाल र प्रतिपक्ष कांग्रेसको निष्कर्ष छ ।

सोही कारण पनि ओलीको मनपरी निरंकुशता रोक्न उनलाई साथ दिनेलाई महाअभियोग लगाउनुपर्ने नेकपाका बहुमत पक्षको योजना छ । जसलाई कांग्रेसको पनि समर्थन छ । तर यो अस्त्र त्यति सजिलैसँग कार्यान्वयन गर्न भने चुनौति छ ।

मूलकारण अहिले संसद अधिवेशन स्थगित गरिएको छ । प्रतिपक्षी कांग्रेसले संसद अधिवेशन बोलाउन माग गरिरहेका बेला सत्तारुढ दलका धेरै नेताहरुले समेत अहिले संसद अधिवेशन बोलाउन माग गरिरहेका छन् । जसकारण ओली झन दबाबमा छन् ।