राष्ट्रपतिलाई महाअभियोगमार्फत हटाउन तरूण दल अध्यक्ष बस्नेतकाे माग

१ पुस, काठमाडौं । नेपाल तरूण दलले राष्ट्रपति विद्यादेवी भण्डारीलाई महाअभियोगमार्फत हटाउन माग गरेको छ। आज विज्ञप्ति जारी गर्दै तरूण दलका अध्यक्ष जीतजंग बस्नेतले राष्ट्रपतिलाई महाअभियोग र प्रधानमन्त्री केपी शर्मा ओलीलाई अविश्वास प्रस्ताव ल्याएर पदबाट हटाउनु पर्ने उल्लेख गरेका छन् ।

सरकारको सिफारिसमा राष्ट्रपतिले संवैधानिक परिषद सम्बन्धी अध्यादेश जारी गरेकोमा तरूण दलले विरोध गरेको हो । ‘राष्ट्रपतिको भूमिका सबै नागरिकको अभिभावक हुनुपर्नेमा प्रधानमन्त्रीको कारिन्दा र संबिधानको भक्षक जस्तो देखिन आएको हुँदा राष्ट्रपतिलाई महाअभियोग र प्रधानमन्त्रीलाई अविश्वासको प्रस्तावबाट पदबाट हटाइ मुलुकलाई संकटबाट मुक्त गर्नका लागि नेपाल तरुण दल केन्द्रीय समिति जोडदार माग गर्दछ,’ अध्यक्ष बस्नेतले निकालेको विज्ञप्तिमा भनिएको छ।

सरकारले महिनौंदेखि संसदलाई बन्धक बनाएको आरोप तरूण दलको छ। उपसभामुख पद खाली राखेर प्रधानमन्त्रीले स्वेच्छाचारी तरिकाले अध्यादेश ल्याएको तरूण दलको भनाइ छ।