विशेष अधिवेशन माग गर्दै नेकपा सांसद शीतलनिवासमा, सचिवको मोवाइल स्वीच अफ

१ पुष, काठमाडौं ।  केपी ओलीको ज्यादतिविरुद्ध पार्टी संरचना निरीह देखिएपछि नेकपा आवद्ध सांसद्हरु नै अघि सरेका छन् । संसद छलेर अध्यादेशमार्फत मुलुक चलाउने ओलीको चालबाट दिग्दार भएका सांसद्हरुले आज विशेष अधिवेशन बोलाउन राष्ट्रपति गुहारेका छन् ।

संघीय संसदको विशेष अधिवेशनको माग गर्दै सत्तारुढ नेकपा सांसद शीतलनिवास पुगेका छन् । नेकपा सांसद भीम रावल, पम्फा भुसालसहितको सांसदहरुको टोली हस्ताक्षरसहित विशेष अधिवेशन माग गर्दै राष्ट्रपति कार्यालय शीतलनिवास पुगेका हुन् ।

राष्ट्रपति कार्यालयका सचिव हरि पौडेलको मोवाइल स्वीच अफ रहेकाले उनीहरुले विशेष अधिवेशन माग गर्दै लेखेको निवेदन र सांसदहरुको हस्ताक्षर बुझाउन पाएका छैनन् । सत्ताधारी दलका सांसद्हरुले हस्ताक्षर गरी शीतल निवासमा बुझाउन गएकाहरुलाई राष्ट्रपति कार्यालयले भने सहयोग गरेन ।

हस्ताक्षरसहितको निवेदन दर्ता गर्न खोज्दा राष्ट्रपति कार्यालयका सचिव नै देखापरेनन् । लामो समय कुर्दासमेत सचिव अनुपस्थित रहेकाले सांसद्हरुले सचिवालयमा साे निवेदन दर्ता गरेका छन् ।

आफूहरुको निवेदन षड्यन्त्रपूर्वक बुझ्न नमानेको शीतलनिवास पुगेकाे नेताहरुले बताएका छन् ।