साढे ५ बजे संवैधानिक परिषद बस्दै, ६ बजे क्याबिनेट डाके ओलीले

२ पुष, काठमाडौं । प्रधानमन्त्री केपी ओली हुकुमी शासनमा विश्वास गर्छन् । कुनैबेला फ्रान्सका सम्राट लुई चौधौं भन्ने गर्थे – म नै राज्य हुँ । नेपालको हकमा पनि यस्ता सनकी शासक थिए जंगबहादुर राणा । उनी भन्ने गर्थे रे जंगेले जे बोल्यो त्यही कानून हो ।

आज एक्काइसौं सताब्दीमा समेत नेपाली जनताले नयाँ जंगबहादुर पाएकाछन् केपी ओलीको स्वरुपमा । ओलीलाई संसद् वा विधिपद्धति मन पर्दैन । केवल उनका मनमा उर्लेका भावना पूरा गर्न पाउनुपर्छ । त्यसैले उनी कुनैपनि बैधानिक बाटो हिंड्न रुचाउँदैनन् । संसद् बोलाउनेबेला अध्यादेश जारी गर्न उनी हतारिन्छन् ।

जब उनकै पार्टीका ८३ जना सांसद्ले संसद्को विशेष अधिवेशनको माग गर्न शीतल निवासमा धर्ना थिए अनि भने ओली गलेका थिए । त्यही अस्त्रले गर्दा ओलीले अध्यादेश फिर्ता गर्न सहमति जनाए ।  भारी मनले उनले सहमति त जनाए , तर फिर्ता गर्न मनैले मानेकोछैन । जब परिषद सदस्यसमेत रहेका प्रधानन्यायधीशले अब परिषदमा आउन नमिल्ने जानकारी दिए अनि चाहिं ओली फिर्ता गर्न वाध्य भएका हुन् ।

यसै प्रयोजनका लागि साँझ ६ बजे उनले मन्त्रिपरिषद बैठक डाकेकाछन् । सम्भवतः अध्यादेश फिर्ता गर्ने उनले निर्णय त्यहाँ लिनेछन् । तर मन्त्रिपरिषद बैठक अगावै ओलीले साढे ५ बजे संवैधानिक परिषद बैठक डाकेको स्रोतले बताएको छ । परिषद बैठक किन बोलाइएको भन्ने सन्दर्भमा स्रोतले प्रष्ट पार्न सकेन ।