ओलीले बाेलाएकाे संवैधानिक परिषद्को बैठक बस्दै नबसि स्थगित

२ पुष, काठमाडाैं । बिहीबार साढे ५ बजेका लागि बोलाइएको संवैधानिक परिषदकाे बैठक स्थगित भएको छ । संवैधानिक परिषद्सम्बन्धी जारी भएको अध्यादेश फिर्ता लिने सहमति भएको भोलिपल्टै प्रधानमन्त्री केपी ओलीले परिषद्को बैठक बोलाएका थिए ।

बुधबार मात्र नेकपाको स्थायी कमिटी बैठकमा अध्यादेश फिर्ता लिने सहमति भएको थियो । बालुवाटारमा प्रधानमन्‍त्री केपी ओली र कार्यकारी अध्यक्ष पुष्पकमल दाहाल प्रचण्डबीचको छलफलपछि बैठक स्थगित भएको हो।

संवैधानिक परिषद्सम्बन्धी जारी भएको अध्यादेश फिर्ता लिने सहमति भएको अवस्थामा नयाँ अध्यादेश अनुसार नै बैठक बोलाउनु उपयुक्त नभएको भन्दै कार्यकारी अध्यक्ष प्रचण्डले बैठक स्थगित गर्न आग्रह गरेपछि बैठक स्थगित भएको हो।

प्रधानमन्‍त्रीले बैठक डाकेपछि प्रचण्डसहितका नेताहरूले छलफल गरी प्रचण्ड बालुवाटार पुगेका थिए । उनले ओलीसँग झन्डै आधा घन्टा छलफल गरेका थिए । मन्त्रिपरिषद्ले अध्यादेश फिर्ता गर्ने निर्णय गरेर औपचारिक रुपमा अध्यादेश फिर्ता भएपछि मात्र बैठक डाक्‍ने सहमति भएको छ।

प्रधानमन्त्री ओलीले विवादित अध्यादेश फिर्ता नहुँदै प्रधानमन्‍त्रीले परिषद् बैठक बोलाएपछि राजनीतिक वृत्तमा अन्योल र आशंका बढेको थियो।