राष्ट्रपतिलाई भेटेर मात्रै अध्यादेश फिर्ता लिने ओलीको तयारी

२ पुस, काठमाडौं । हतारमा जारी गरेर प्रमाणीकरण गरिएको अध्यादेश फिर्ता लिन प्रधानमन्त्री केपी शर्मा ओलीले राष्ट्रपति विद्यादेवी भण्डारीसँग भेटवार्ता गर्ने भएका छन् । बुधबार आयोजित स्थायी कमिटीको बैठकमा प्रधानमन्त्री ओलीले अध्यादेश फिर्ता लिने प्रतिवद्धता जनाएपनि आनाकानी गरिरहेका छन् ।

बिहीबार ५ बजेका लागि संवैधानिक परिषदको बैठक डाकिएपछि आक्रोशित भएका प्रचण्डको दबाबपछि ओलीले राष्ट्रपतिलाई भेटेर अध्यादेश फिर्ता लिने तयारी गरेका हुन् ।

प्रचण्डले भेटेर आपत्ति जनाएपछि प्रधानमन्त्रीले संवैधानिक परिषदको बैठक भने स्थगन गरेर ६ बजे बालुवाटारमा मन्त्रिपरिषदको बैठक डाकेका छन् । मन्त्रिपरिषद बैठकले अध्यादेश फिर्ता लिने निर्णय गरिसकेपछि राष्ट्रपतिबाट अध्यादेश फिर्ताको औपचारिक निर्णय गर्नुपर्ने हुन्छ ।