सभामुख सापकोटाविरुद्ध सर्वोच्चमा व्यक्ति हत्याको मुद्दा, आज पेशी तोकियो

३ पुस, काठमाडौं । सत्तारुढ नेकपाभित्र पछिल्लाेसमय विवाद बढिरहेका बेला प्रधानमन्त्री केपी शर्मा ओली र सभामुख अग्नि सापकोटाबीचको शीतयुद्ध चर्किएको छ । संवैधानिक परिषदको बैठकमा नगएर ओलीसँग जोरी खोजेको आरोप लागेका सापकोटाविरुद्ध सर्वोच्च अदालतले व्यक्ति हत्या मुद्दामा पेशी तोकेपछि यस्ताे  आशंका गरिएकाे हाे ।

सापकोटाको मुद्दा प्रधानन्यायाधीश चालेन्द्रशम्शेर जबरा, दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठको संवैधानिक इजलासमा परेको हो । यसअघि ३० फागुन २०७६ मा यो मुद्दा पेशीमा चढाइएको थियो, तर हेर्न नभ्याएपछि सुनुवाई सरेको थियो ।

काभ्रेका अर्जुन लामाको हत्यामा सापकोटाको नाम मुछिएको छ । उनकी पत्नी पूर्णिमाया लामाले ७ मंसिर २०६९ मा सर्वोच्च अदालतमा मुद्दा दायर गरेकी हुन् । यो मुद्दा विचाराधीन रहेकै बेला सापकोटा सञ्चारमन्त्री बनेपछि कणकमणि दीक्षित लगायतले अदालतको अवहेलना मुद्दा समेत हालेका थिए ।

त्यही मुद्दाको पेशी शुक्रबार तोकिएको छ । यसअघि निवर्तमान सभामुख कृष्ण महरालाई पनि यसरी नै फसाइएको आरोप छ । अहिले पूर्व एमाले पक्षले सापकोटालाई पनि द्वन्द्वकालिन मुद्दामा फसाउने योजना बनाएको अनुमान गर्न सकिन्छ ।