अध्यादेश फिर्ता नगरेर ओलीले पार्टी फुटाउन खोजेको प्रचण्डको आशंका

३ पुष, काठमाडौं । सत्तारुढ नेकपाका अध्यक्ष पुष्पकमल दाहाल प्रचण्डले संवैधानिक परिषद्सम्बन्धी अध्यादेश फिर्ता नभए पार्टीभित्र गम्भिर अवस्था आउने चेतावनी दिएका छन् । प्रदेश १ का प्रचण्ड र वरिष्ठ नेता माधवकुमार नेपाल निकट नेताहरुको भेलालाई सम्बोधन गर्दै प्रचण्डले अध्यादेश फिर्ता गर्ने पार्टी निर्णय भएकाले कार्यान्वयनमा ढिलाइ गरे अवस्था गम्भिर हुने बताएका हुन् ।

ओली पार्टी विभाजन गर्ने योजनाका साथ एकपछि अर्को कदम चालिरहेकाले अध्यादेश पनि ल्याइएको प्रचण्डको दाबी थियो । तर, पार्टी जोगाउँदै ओलीले चाल्ने गलत कदमविरुद्ध जुनसुकै विकल्पमा जान आफूहरु पनि तयार रहेको प्रचण्डले बताए ।

लामो समय सैद्धान्तिक विषयमा बोलेका प्रचण्डले पूर्वएमाले र पूर्वमाओवादी भन्ने सोंच नै नराख्न आग्रह गरेका थिए । पेरिसडाडाँमा भएको भेलामा प्रदेश १ का प्रचण्ड र माधव नेपाल पक्षका जिल्ला अध्यक्ष, सचिव र राजधानीमा उपलब्ध केन्द्रीय सदस्यहरु सहभागी थिए ।

प्रचण्ड र माधव पक्षको गुटगत भेलाले ओलीलाई झन तरंगित बनाएको छ ।