बालुवाटारमा तारेख धाउँदै प्रचण्ड

२ पुष, काठमाडौं । मियो बिनाको दाइँ झै देखिएको नेकपामा दुई अध्यक्षबीचको चर्काचर्की झनै बढेको छ । आन्तरिक द्वन्द र चार्काचर्की चलिरहेकै बेला प्रधानमन्त्री तथा नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच आज साँझ भेट भएको छ।

बालुवाटारको तारेख नधाउने प्रचण्डको आफ्नै उद्घोषमा समेत उनी टिक्न नसकेपछि शुक्रबार साँझ ओलीलाई भेट्न प्रचण्ड बालुवाटार नै पुगेका थिए । ओलीले आफुनिकटका बाहेकको राजनीतिक करियर नै सिध्याउने खेल खेलेको छनक पाएपछि ओली इतरका नेता कार्यकर्तालाई नेकपाभित्र टिक्न मुस्किल परिरहेको छ । साँझको भेटमा प्रचण्डले प्रधानमन्त्रीलाई संवैधानिक परिषदसम्बन्धी अध्यादेश फिर्ता लिन फेरि पनि माग गरेको बुझिएको छ । हिजो पनि दुई अध्यक्षबीच भेट भएको थियो।

भेटमा प्रचण्डले अध्यादेश फिर्ता लिन भनेका थिए। तर प्रधानमन्त्री ओलीले भने अझै केही परामर्श गरेरमात्रै फिर्ता लिने जवाफ दिएका थिए। मंगलबार प्रधानमन्त्री ओलीले संवैधानिक परिषदसम्बन्धी अध्यादेश ल्याएका थिए । त्यस पछि उत्पन्न परिस्थितिका कारण बुधवार अध्यादेश फिर्ता गर्न तयार भएका थिए । तर हिजो बेलुका मन्त्रीपरिषद् बैंठक बसे पनि अध्यादेशबारे न त कुनै जानकारी भयो न त फिर्ता लिने निर्णय नै भएको थियो।

अध्यादेश रनाटकैबीच आज दिउँसो पार्टी कार्यालय पेरिस डाँडामा प्रदेश १ का प्रचण्ड–नेपाल समूह निकट जिल्ला अध्यक्ष र सचिवहरूको भेला भएको थियो। भेलालाई सम्बोधन गर्दै प्रचण्डले प्रधानमन्त्री ओलीको एकलौटीपन र पछिल्लो परिस्थितिविरूद्ध सबै एकजुट भएर लड्नुपर्ने बताए थिए। भेलाले ओलीले अध्यादेश फिर्ता नलिए थप कदम चाल्ने निष्कर्षसमेत निकालेको बताइएको छ।

प्रचण्डले प्रदेश नम्बर १ का नेताहरुलाई प्रधानमन्त्री ओलीकै तालमा आफु पनि लागेको भए पार्टी धेरै महिना पहिले नै विभाजन भइसक्ने बताएका थिए । उनले पार्टी विभाजन हुन नदिएको बताएका थिए । प्रधानमन्त्री ओलीले आफूसँग गरेको प्रतिवद्धतामा एक घण्टा पनि टिक्न नसकेको गुनासो बैठकमा गरेका थिए । बालुवाटारमा भेट हुँदा ओलीले अध्यादेश फिर्ता लिने, पार्टीको सहमति र छलफल अनुसार सबै कामलाई अगाडि बढाउने, यसअघि भएका नियुक्तिहरु फिर्ता लिने जस्ता प्रतिवद्धताहरु जनाएका थिए । तर स्थायी कमिटीको बैठक सकिने वित्तिकै ती सबै प्रतिवद्धतालाई बेवास्ता गरेको कुरा प्रचण्डले उपस्थित नेताहरु समक्ष राखेका थिए ।