प्रधामन्त्रीको असंवैधानिक कदमपछि शेयरबजारमा गयो पहिरो

५ पुष, काठमाडौं । प्रधानमन्त्री केपी शर्मा ओलीले संसद विघठनको सिफारिस गरेसँगै नेपाल स्टक एक्सचेन्ज (नेप्से) परिसुचकमा भारी अंकले गिरावट आएको छ । साताको पहिलो दिन आइतबार प्रि–ओपनिङ्गमै शेयरबजार परिसूचक मापक नेप्से १४.०५ अंकले बढेर २ हजार ४६.५७ बिन्दुमा पुगेको थियो । तर, प्रधानमन्त्रीले संसद विघठनको सिफारिस गरेको समाचार बाहिरिएसँगै बजारमा उच्च अंकको गिरावट आएको हाे ।

आज बजार खुलेको १५ मिनेटमा नै ५८ अंकले घटेको थियो । प्रधानमन्त्रीले आज आकस्मिक बैठक आह्वान गरी संसद विघटन गर्ने सिफारिससँगै देशको पूँजीबजारमा सिधै असर देखिएको छ । पहिलो १५ मिनेटमा नै घट्दो बजारमा ६५ करोडको कारोबार भएको थियो ।

शतप्रतिशन लाभांश घोषणपछि आज नै हिमालयन डिष्टिलरीको कारोबार खुलेको थियो । आजबाटै शेयर कारोबार खुलेको युनाइटेड इदीमदी र हिमालय डिस्टिलरीको शेयरमूल्यमा सकारात्मक सर्किट लागेको छ भने माउन्टेन इनजी नेपालको शेयरमूल्यमा ऋणात्मक सर्किट लागेको छ ।

पछिल्लो समय बढेको बजारमा नेपाल राष्ट्र बैंकले मौद्रिक नीतिको प्रथम समीक्षा मार्फत व्यक्तिगत र शेयर कर्जाको पुनरावलोकन गर्ने जनाएपछि केही घटेको थियो । फेरि गएको शुक्रबार अर्थ मन्त्रीले शेयर कारोबारमा लाग्ने ब्रोकर कमिशन घटाउन निर्देशन दिएसँगै शेयर बजारमा वृद्धि हुने अपेक्षा लिएता पनि प्रधानमन्त्रीको आजको कदमले बजारमा लगानीकर्ताको मोनबल गिराएको देखिएको छ ।

कारोबार खुलेको डेढ घण्टामा घट्दो बजारमा कुल ४५ लाख ८६ हजार ८९ कित्ता शेयर कुल तीन अर्ब १८ करोड ८७ लाख ६८ हजार आठ सय ८३ रुपैयाँमा कारोबार भइसकेको छ ।