कांग्रेसको आकस्मिक बैठक देउवा निवासमा बस्दै

५ पुस, काठमाडौं । अकस्मात संसद विघटन गर्ने प्रधानमन्त्री केपी ओलीको एकल निर्णय बारे पार्टीमा गम्भीर छलफल गरि आफ्नो धारणा स्पष्ट गर्न प्रमुख प्रतिपक्ष नेपाली कांग्रेसले पदाधिकारी तथा पूर्व पदाधिकारीहरुको आकस्मिक बैठक बोलाएको छ ।

आज आइतबार दिउँसो १ बजे सभापति शेरबहादुर देउवाको निवास बुढानिकण्डमा बैठक बोलाइएको देउवाका स्वकीय सचिव भानु देउवाले जानकारी दिएका छन् ।

प्रधानमन्त्री ओलीले संविधान मै नरहेको संसद बिघटनको प्रावधान विपरित संसद बिघटनको निर्णय लिएपछि यसको चौतर्फी बिरोध भैरहेको छ । नेकपामा लगातार बढेको विवादले संसद बिघटनको हदसम्म पुगेपछि देशविदेशमा ठूलै राजनीतिक तरङ ल्याएको छ ।