पूर्व माओवादी पक्ष क्याबिनेट छाड्दै

५ पुष, काठमाडौं । प्रधानमन्त्री केपी ओलीले संसद् विघटनको सिफारिश गरेपछि पाँच जना मन्त्रीले राजीनामा दिने तयारी गरेका छन् । पूर्व माओवादी पक्षका मन्त्रीहरुले राजीनामा दिने भएका हुन् ।

आजको स्थायी कमिटी बैठक लगत्तै राजीनामा दिने जानकारी खुमलटार निकट स्रोतले दिएकोछ । राजीनामा दिन तयार भएका मन्त्रीहरुमा उर्जामन्त्री वर्षामान पुन, शिक्षा मन्त्री गिरिराजमणि पोखरेल, बनमन्त्री शक्तिबहादुर बस्नेत, खानेपानी मन्त्री बीना मगर र श्रममन्त्री रामेश्वयर राय यादव रहेका छन् ।

स्रोतका अनुसार, अध्यक्ष पुष्पकमल दाहाल प्रचण्डले पूर्व माओवादी पक्षका सबै मन्त्रीलाई राजीनामा दिने मनस्थिति बनाउन भनेका छन् । तर गृहमन्त्री रामबहादुर थापा र उद्योगमन्त्री लेखराज भट्टले भने राजीनामा दिने वा नदिने प्रष्ट पारेका छैनन् ।

उता, ओलीको विपक्षमा रहेका नेता माधवकुमार नेपाल पक्षका मन्त्रीहरु भने अहिले तत्कालै मन्त्रिपरिषदबाट नबाहिरिहने संकेत गरेका छन् । नेता नेपाल निकट स्रोत भन्छ– पहिला संसद् विघटनको सिफारिश के हुन्छ हेरौं अनि मात्रै थप निर्णय गरौंला ।