संसद विघटन अगावै अविश्वास प्रस्ताव दर्ता

५ पुष, काठमाडौं । बिहान करिब साढे १० बजे संसद सचिवालयमा सत्ताधारी दल नेकपाका सांसद्हरुको चलहपहल बढ्यो । सचिवालयका कर्मचारीहरु केही न केही पक्कै हुनलागेको लख काटे ।

नेकपाका नेता जनार्दन शर्माको कुदाकुद अलि बढ्तै थियो । एकैछिनमा ९० जना सांसद्को हस्ताक्षर रहेको एउटा कागजका साथ शर्माले निवेदनपनि दर्ता गराए । निवेदनको विषय थियो– सरकारविरुद्ध अविश्वास प्रस्ताव ।

यसअघि प्रधानमन्त्री केपी ओलीले मन्त्रिपरिषद बैठक डाकेर संसद विघटनको सिफारिश गरेको खबर क्याबिनेट सदस्यबाटै पुष्पकमल दाहाल प्रचण्डलगायत नेताहरुसमक्ष पुग्यो । लगत्तै प्रचण्ड र नेता माधवकुमार नेपालले पुरानो हस्ताक्षरसहितको अविश्वासको प्रस्ताव दर्ता गर्न अह्राए ।

यसैबीच राष्ट्रपति विद्यादेवी भण्डारीलाई भेटेर ओली बालुवाटार पुगेका मात्र के थिए, अविश्वास प्रस्ताव दर्ता भएको जानकारी पाए । त्यसपछि ओलीले त्यहींबाट राष्ट्रपति भण्डारीलाई फोन गरी तत्कालै संसद विघटनको सिफारिश कार्यान्वयन गर्न आग्रह गरे ।

यसअघि भने एक दुई दिन रोकेर राष्ट्रपतिले परामर्श गरेको नाटक गर्ने सहमति ओलीसँग भएको थियो । तर अविश्वास प्रस्तावले गति लिएको अवस्थामा सरकार अफ्ठेरोमा पर्ने भन्दै तत्कालै संसद विघटनको विज्ञप्ति राष्ट्रपति कार्यालयले जारी गरेको थियो ।