कांग्रेसले केन्द्रीय कार्यसमिति बैठक बोलायाे

५ पुष, काठमाडौं । नेपाली कांग्रेसले पार्टी केन्द्रीय कार्यसमितिको बैठक बोलाएको छ । आइतबार मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधि सभा भंग गरेर मध्यावधि निर्वाचनको घोषणा गरेको सन्दर्भमा कांग्रेसले छलफलको लागि केन्द्रीय कार्यसमिति बैठक बोलाएको हो ।

बैठक पुस ७ गते मंगलबार दिउँसो १ बजे पार्टीको केन्द्रीय कार्यालय सानेपामा बस्ने नेपाली कांग्रेसद्वारा जारी विज्ञप्तिमा उल्लेख छ । बैठकमा केन्द्रीय कार्यसमितिका पदाधिकारी, केन्द्रीय सदस्यहरु तथा आमन्त्रित केन्द्रीय सदस्यहरुको उपस्थिति रहने कांग्रेसले जनाएको छ ।

आइतबार बिहान बसेको मन्त्रिपरिषद्को आकस्मिक बैठकले संसद् भंग गरी मध्यावधि निर्वाचनमा जानको लागि सिफारिस गरेको छ । सिफारिस अनुसार राष्ट्रपतिले वैशाख १७ र २७ गते निर्वाचनको मिति तोकेकी छन् ।