देश अस्थिरता र अराजकताको भुमरीमा फस्यो : राप्रपा

५ पुष, काठमाडौं । राष्ट्रिय प्रजातन्त्र पार्टीका अध्यक्ष पशुपति शम्शेर ज.ब.रा.को अध्यक्षतामा बसेको पार्टीको केन्द्रीय सचिवालय कार्य व्यवस्था समितिको आकस्मिक बैठक बसेको छ । बैठकले मुलुकको समसामयिक राजनीतिक विषयहरुमा वृहद छलफल गरि विभिन्न निर्णयहरु गरेको छ । बैठकमा अध्यक्षद्वय डा.प्रकाशचन्द्र लोहनी र कमल थापा समेतको उपस्थिति रहेको थियो ।

बैठकले प्रतिनिधि सभा विघटन गर्ने नेकपा नेतृत्वको सरकारको निर्णय संविधान र प्रजातान्त्रिक मूल्य मान्यता विपरित रहेको ठहर गरेको छ । मन्त्रिपरिषदको सिफारिसमा संसद विघटन हुने व्यवस्था संविधानले नगरेको उल्लेख गरिएको छ । सत्तारुढ दल नेकपा भित्रको आन्तरिक विवाद र विग्रहको कारण देश अस्थिरता र अराजकताको भुमरीमा फसेको राप्रपाले बताएको छ ।

विज्ञप्ति जारी गर्दै राप्रपाले प्रजातान्त्रिक मूल्य मान्यतालाई गंभीर क्षति पु¥याएको, राप्रपा उक्त असंवैधानिक, अलोकतान्त्रिक र प्रतिगामि निर्णयको विरोध र भत्सर्ना गरेको छ । मन्त्रिपरिषदको दुरासयपूर्ण र स्वेच्छाचारी निर्णयको पक्षमा उभिएर राष्ट्रपतिले राष्ट्रप्रमुखको तटस्थ भूमिकालाई फेरि एकपटक विवादास्पद तुल्याएको उल्लेख गरेको छ । प्रतिनिधिसभा विघटनको पछिल्लो घटनाक्रमले २०६२/६३ पछि अवलम्बन गरिएको अवधारणा र मार्गचित्र गलत छ भन्ने तथ्यलाई थप पुष्टि गरेको जनाएको छ । परिवर्तित सन्दर्भलाई विगतको त्रुटि कमिकमजोरी सच्याउने र राष्ट्रिय मेलमिलापको नीति अनुरुप सबै नेपाली अटाउने राजनीतिक संरचना र शासकीय स्वरुप निर्माणको अवसरका रूपमा प्रयोग गर्न सम्वद्ध सबै पक्षलाई राप्रपा आव्हान गरेको छ ।