पुल्चोकमा गृहमन्त्री बादलको छुट्टै भेला

६ पुष, काठमाडौं । सत्तारुढ नेकपाका प्रभावशाली नेता तथा गृहमन्त्री रामबहादुर थापा बादलले पुल्चोकमा छुट्टै भेलाको आयोजना गरेका छन् । आइतबार संसद विघटन भएपनि राजीनामा नदिएका बादलले पुल्चोकमा छ्ट्टै भेला गरेर आफ्नो गुट कायमै रहेको सन्देश दिएका हुन् ।

प्रचण्डको भनाई अनुसार उनी  पूर्व माओवादी बनेका छैनन् भने ओलीतिर ढल्किएपनि पूर्ण रुपमा माओवादी गुट छाडिसकेका छैनन् । नेकपा अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल पक्षका सात मन्त्रीले राजीनामा दिए पनि बादलले केपी शर्मा ओली काे क्याबिनेट छोडेका थिएनन् । उनले राजीनामा नदिएपछि बादल प्रधानमन्त्री ओलीको पक्षमा उभिएको विश्लेषण गरिएको थियो ।

सोमबार बिहान प्रधानमन्त्री ओलीले विघटित प्रतिनिधिसभा र राष्ट्रियसभामा रहेका आफू पक्षीय सांसदहरूलाई बालुवाटारमा बोलाएका थिए । राष्ट्रियसभा सदस्य रहेका बादल उक्त भेलामा नगएका हुन् ।

तत्कालीन माओवादीबाट छुट्टिएर मोहन वैद्यसँग जाँदाको समूह अहिले पनि बादलसँग छ । बादलसहित पम्फा भुषाल र देव गुरुङ सो समूहका प्रभावशाली नेताहरु हुन् । बादलको समूहमा अरु सांसद पनि छन् भने केही युवा नेताहरु पनि छन् ।