नेकपाको अध्यक्षबाट ओली बर्खास्त

६ पुष, काठमाडौं । प्रधानमन्त्री केपी ओलीले संसद विघटन गराएपछि चर्किएको विवादका बीच नेकपाले उनलाई कारबाही गरि बर्खास्त गरेकाे औपचारिक जानकारी निर्वाचन आयोगलाई दिएको छ ।

आज दिउँसो स्थायी कमिटीले गरेको निर्णय बमोजिम ओलीमाथि अनुशासनको कारबाही भएकाले उनी बैधानिक रुपमा पार्टीकाे आधिकारिक अध्यक्ष नभएको जानकारी गराइएको स्थायी कमिटी सदस्य बेदुराम भूषालले दिए ।

अब ओली नेकपाको अध्यक्ष हुनुहुन्न, यसलाई औपचारिक रुपमा भोलि बस्ने केन्द्रीय कमिटी बैठकले अनुमोदन गर्ने पनि नेता भूषालले बताए ।तर प्रधानमन्त्री ओली भने आफू नै नेकपाको वैधानिक अध्यक्ष भएकाले कसैले हटाउने प्रश्न नै नउठ्ने तर्क गरिरहेका छन् ।

आज बिहान सरकारी निवासमा भेला भएका आफूपक्षधर पूर्व सांसद्हरुलाई सम्बोधन गर्दै ओलीले भनेका थिए– दोस्रो हैसियत भएको पूर्व माओवादी नेताले म पूर्वएमाले अध्यक्षलाई हटाउने हैसियत कस्ले दियो ? ओलीको यो अभिव्यक्तिले अब उनी नेकपा एमाले व्युँताएर अगाडि बढ्ने पक्षमा रहेको संकेत गरेका छन् ।