एनएमबी बैंकको १६.२० प्रतिशत लाभांश दिने घोषणा

६ पुष, काठमाडौं । गत वर्ष सर्वाधिक लाभांश वितरण गरि १ नम्बरको चर्चामा आएको एनएमबी बैंकले यसवर्ष भने लगानीकर्तालाई उत्साहजनक लाभांश वितरण गर्न नसक्ने भएको छ । बैंकले १६.२० प्रतिशत लाभांश दिने घोषणा गरेको छ । अहिलेसम्म लाभांश प्रस्ताव गरेका बैंकहरुमध्ये एनएमबी चौथो नम्बरमा पुगेको छ । बैंकको विगतको दुई वर्षको प्रतिफल वितरणको हिसाबमा आधा भन्दा पनि कम हो ।

​२०७५/७६ मा बैंकले २१ प्रतिशत बोनस शेयर र १४ प्रतिशत नगद लाभांश गरी ३५ प्रतिशत लाभांश वितरण गरेको थियो । त्यस्तै २०७४/७५मा २० प्रतिशत नगद लाभांश र १० प्रतिशत बोनस शेयर दिएको थियो । बैंकको हिजो बसेको सञ्चालक समिति बैठकले २०७६/७७ को नाफाबाट १३ प्रतिशत बोनस शेयर र कर प्रयोजनसहित ३.२० प्रतिशत नगद लाभांश दिने निर्णय गरेको छ ।

सीईओ सुनिल केसीले अहिले बैंकको उच्च व्यवस्थापन समालिरहेका छन् । तर लगानीकर्ता, शेयरधनीको नजरमा राम्रो लाभांश दिने बैंकको रुपमा परिचित यो बैंक यसपटकको लाभांश प्रस्तावका कारण हात्ती आयो हात्ती आयो फुस्सा भने झैं भएको छ । केही लगानीकर्ताले यो लाभांश घोषणालाई बैंक व्यवस्थापन टीमको लाजमर्दो प्रस्तुतिको रुपमा व्याख्या गरेका छन् ।

बैंकले यसपटक १ अर्ब ८७ करोड ८२ लाख ७ हजार ८०० रुपैयाँ बराबरको बोनस सेयर बाँड्नेछ । यस्तै, ४६ करोड २३ लाख २८ हजार ९४ रुपैयाँ नगद लाभांश वितरण गर्नेछ । राष्ट्र बैंक र आगामी साधारण सभाले अनुमोदन गरेपछि लगानीकर्तालाई प्रस्तावित लाभांश वितरण हुनेछ ।