मैले बोलाएको बैठक मात्र आधिकारिक हुन्छ : अपदस्थ अध्यक्ष ओली

६ पुष, काठमाडौं । प्रधानमन्त्री एवं सत्तारुढ नेपाल कम्युनिष्ट पार्टी ‘नेकपा’का अपदस्थ अध्यक्ष केपी ओलीले आफूले बोलाएको बाहेक अरुले बोलाएको पार्टीका बैठक आधिकारिक नहुने बताएका छन्। अपदस्थ अध्यक्ष ओलीले पछिल्लो राजनीतिक घटनालगायत विषयमा आज प्रधानमन्त्री निवास बालुवाटारमा पार्टीका केन्द्रीय सदस्य तथा विघटित प्रतिनिधिसभाका सदस्यसँगको परामर्श बैठकमा सो तर्क राखेका छन् ।

प्रधानमन्त्रीका प्रेस सल्लाहकार एवं पार्टीका केन्द्रीय सदस्य सूर्य थापाले पार्टीको विधानअनुसार पहिलो वरियताको अध्यक्षका हैसियतले आफ्नो सहमतिविनाको बैठक र निर्णयको कुनै अर्थ नहुने अपदस्थ अध्यक्ष ओलीले बताए । सल्लाहकार थापाले ओलीमाथि पार्टीले अनुशासनको कारवाही गर्ने भन्ने निर्णय भनिएको विषयलाई औपचारिकता नमान्न सञ्चारमाध्यमलाई पनि आग्रह गरे ।

अपदस्थ अध्यक्ष ओलीले यही पुस ७ गते बिहान ९ बजे प्रधानमन्त्री निवास बालुवाटारमा पार्टी केन्द्रीय कमिटीको बैठक आह्वान गरेका छन् । अर्का अध्यक्ष पुष्पकमल दाहाल ‘प्रचण्ड’ ले पनि मंगलबार नै अपराह्न १ बजे केन्द्रीय कमिटीको बैठक आह्वान गरेका छन् ।

यता, ओलीले संसद विघटन गराएपछि चर्किएको विवादका बीच नेकपाले उनलाई कारबाही गरि बर्खास्त गरेकाे औपचारिक जानकारी निर्वाचन आयोगलाई दिएको छ ।आजै दिउँसो स्थायी कमिटीले गरेको निर्णय बमोजिम ओलीमाथि अनुशासनको कारबाही भएकाले उनी बैधानिक रुपमा पार्टीकाे आधिकारिक अध्यक्ष नभएको जानकारी गराइएको स्थायी कमिटी सदस्य बेदुराम भूषालले दिए ।

अब ओली नेकपाको अध्यक्ष हुने छैनन, यसलाई औपचारिक रुपमा भोलि बस्ने केन्द्रीय कमिटी बैठकले अनुमोदन गर्ने छ । तर प्रधानमन्त्री ओली भने आफू नै नेकपाको वैधानिक अध्यक्ष भएकाले कसैले हटाउने प्रश्न नै नउठ्ने तर्क गरिरहेका छन् ।