ओली समूहले एकता महाधिवेशन २०७८ मंसिर २ मा गर्ने

७ पुष, काठमाडाैं । नेकपा ओली समूहको केन्द्रीय कमिटी बैठक भर्खरै सकिएको छ । प्रधानमन्त्री निवास बालुवाटारमा बसेको बैठकले आउँदो वर्ष याने कि ०७८ साल मंसिरको २ गतेदेखि ७ गतेसम्म महाधिवेशन गर्ने निर्णय गरेको छ ।

यस अवधिमा पार्टीको महाधिवेशन गर्ने मिति तय भएको हो । साथै बैठकमा अपदस्थ अध्यक्ष एवं प्रधानमन्त्री केपी ओलीले आफूहरू पार्टी एकताको पक्षमा रहेको र फुटको विपक्षमा रहेको जनाएको छ । साथै अध्यक्ष ओलीले कोही पनि नेताहरूमाथि कारबाही नगरिने र पार्टी एकताको पक्षमा रहने बैठकमा बताएको छ ।

यस्तै बैठकले विधान संशोधनको निर्णय पनि गरेको छ भने अर्को बैठक पुस ९ गतेका लागि डाकिएको छ । ओली निकट केन्द्रीय समिति बैठकले प्रवक्तामा परराष्ट्रमन्त्री समेत रहेका ज्ञवालीलाई चयन गरेको छ। अब पार्टीको आधिकारिक धारणा र निर्णयहरु  प्रवक्ता  ज्ञवालीले सार्वजनिक गर्नेछन् ।